ILOILO CITY – 115 na sa 180 ka mga barangay sa syudad sang Iloilo ang nahawanan sang Iloilo City Government clearing team.
Sa interview sang Bombo Radyo kay Anti-Squatting and Illegal Structures Unit (ASISU) Head Love Joy Hosenilla, iya ginpahayag nga naubos na tinlo ang dalagku nga mga barangay kag gagmay na lang nga mga lugar ang saparon subong nga semana.
Doble ang paninguha sang clearing team nga makatapos na sa ila trabaho subong nga semana bangud magapasa na sang report ang DILG Iloilo City sa Department of the Interior and Local Government Central Office sa Disyembre 15.
Positibo si Hosenilla nga makapasar ang syudad sa assessment sa road clearing operations.
Ang road clearing operations nga ginmandu ni Department of the Interior and Local Government Secretary Eduardo Año paagi sa Memorandum 2020-145 ang nag-umpisa sang Nobyembre 16.
