ILOILO CITY – Duha ka anggulo ang ginasundan sang mga pulis may kaangtanan sa pagluthang-patay sa isa ka lalaki sa Barangay Tabuc Suba, Jaro, Iloilo City.
Ang biktima amo si Enranil Umadhay, 54, residente sang Barangay MH Del Pilar, Jaro, Iloilo City kag nakaserbe man anay bilang barangay kagawad sang nasambit nga barangay.
Sa interview sang Bombo Radyo kay Police Captain Mark Anthony Gesulga, hepe sang Jaro Police Station, iya ginpahayag nga posible nga may nakaaway ang biktima bangud sa iya negosyo sa karne sang baboy ukon posible man nga may kaangtanan ini sa iya anay nga kahilabtanan sa iligal nga droga.
Matandaan nga una na ginkumpirma ni Punong Barangay Larry Palomo sang Barangay MH Del Pilar, Jaro, Iloilo City nga napreso ang biktima nga si Umadhay bangud nadakpan sa drug buy bust operation.
Suno naman kay Gesulga, sa iya inisyal nga impormasyon, 2007 sang napreso ang biktima kag nakagwa man sang 2012.
May nakuha nga kopya sang Closed-circuit television (CCTV) footage ang mga pulis apang indi makit-an ang nawong sang riding-in-tandem suspects bangud nakasuksok sila sang helmet kag jacket.
Kun balik-balikan, tatlo ka lupok ang nabatian sang mga residente sa lugar kun diin natabo ang krimen, apang isa lang ang igu sa likod ni Umadhay.
Napasa naman sa crime laboratory ang recovered fired cartridge para sa cross-matching kag ballistic examination kag agud matumod ang tag-iya sang armas.
