Ginsentensyahan sang kamatayon ang isa ka Twitter Killer sa Japan nga amo ang responsable sa pagpatay sa 9 ka mga biktima kag sa pag-chop chop sang ila nga mga lawas sang 2017.
Ang suspek amo si Takahiro Shiraishi, 30 anyos.
Gin-ako ni Shiraishi na siya ang nangamot sa pagpatay sa mga biktima nga lunsay niya nakilala sa social media platform nga Twitter.
Nagaedad 15 tubtob 26 anyos ang mga biktima.
Suno kay Shiraishi, gintarget niya ang mga user sang Twitter nga nagpahayag nga luyag na nila nga mapatay.
Una naman nga nagdepensa ang abogado ni Shiraishi nga kuntani pagkapreso lang ang silot sa suspek bangud suno sa abogado, nagpasugot man ang mga biktima nga patyon sila bangud sang ila nga suicidal thoughts.
Wala ginpamatian sang hukom ini nga pahayag sang abogado kag ginpapanaug ang death penalty sa krimen nga ginhimo sang nasambit nga Twitter Killer.
Ang nasambit nga krimen ang gintawag man sang hukom bilang “cunning and cruel” ilabi na bangud gintarget sang suspek ang mga biktima nga “mentally fragile.”
Una na nga napreso ang suspek sang 2017 kun sa diin iya man nga ginpahayag nga handa siya nga atubangon ang anuman nga silot nga ipananaug batok sa iya.
Nahibaluan nga isa man ang Japan sa developed nations nga may yara sang death penalty.
Tubtob subong, ginadebatehan sa gihapon amo nga pungsod ang krimen ni Shiraish nga may kaangtanan sa suicide.
Isa man ang Japan sa may pinakamataas nga suicide rate sa kalibutan kun sa diin nagalab-ot sa masobra 20,000 ang nagapanginmatay sa tagsa ka tuig.
