TARLAC – Nagsungka na ang pulis nga nagluthang-patay sa mag-iloy sa Paniqui, Tarlac.
Ang mga biktima amo sanday Sonya Gregorio, 52 nga amo ang iloy kag anak sini nga si Frank Anthony Gregorio, 25, residente sang Barangay Cabayaoasan, Paniqui, Tarlac.
Kadungan sang pagsungka ni Police Senior Master Sergean Jonel Nuezca sa Rosales Municipal Police Station, ginturn-over man niya ang 9mm Beretta pistol nga amo ang gingamit sa pagpatay sa mag-iloy.
Si Nuezca ang naka-destino sa Parañaque City Crime laboratory unit.
Magluwas sini, ginsurrender man ni Nuezca, ang iya PNP ID kag 9 live ammunition.
Suno kay Police Major Fernando Fernandez, hepe sang Rosales Municipal Police Station, gin-updan si Nuezca sang iya pamilya sa pagsurrender.
Matandaan nga nag-viral ang video sang mga biktima kaupod ang suspek kag ang iya anak samtang nagabaisay tubtub ginpatay sang pulis ang mag-iloy.
Samtang suno kay Lt. Col. Noriel Rombaoa, hepe sang Paniqui Police Station, nagwa sa ila imbestigasyon nga ginsita sang pulis ang mga biktima nga ila man lang tupad-balay bangud sa pagpalupok sang boga.
“Parang nainsulto siguro hanggang nagkasagutan ang anak niya at ang matandang biktima. Siguro nawindang ang isip niya, dun niya pinaputukan ang mga biktima,” pahayag sang hepe.
May daan na nga hiligut-anon ang magkasilingan bangud sa right of way apang nahitso man ini sa ila barangay.
Sa subong, ginsaylo na sa Paniqui Municipal Police Station ang suspek.
Nagpahanumdom man si Rombaoa nga dapat ipatuman sang mga pulis ang maximum tolerance.
“Sa mga kasamahan po natin sa pulisya dapat self-control kasi nga maximum tolerance tayo, tayo ang may armas. Kung merong umaagrabiyado sa atin merong right forum po riyan, puwede nating kasuhan, not to the point na gagamitin natin ang baril natin,” dugang pa sang hepe.
