Nagapadayon pa ang search ang retrieval operations sa isa ka solterito nga nalumos sa suba sa Barangay Compo, San Enrique, Iloilo.
Ang missing amo si Nino Asong Jabonillo, 17 anyos, residente sang Banate, Iloilo.
Matandaan nga natabo ang insidente pasado 7:00 kahapon sang aga, Disyembre 20.
Nagasakay sa balsa nga kawayan ang solterito kaupod ang duha niya ka pakaisa sang nasangit siya sa naga-ulbo nga kawayan kag nadala sang masulog nga tubig.
Una na ginpahayag nga indi man makahibalo maglangoy ang duha niya ka upod.
Magapadulong kuntani sa tabok nga barangay ang tatlo agud magtapas sang tubo.
Sa interview sang Bombo Radyo kay Felipe Galino, commander sang Mountain Tigers Search and Rescue Pototan Unit, iya ginpahayag nga tatlo na ka team ang nagapangita sa lawas ni Jabonillo.
Nagaplano ang rescue group nga sa dam sa banwa sang Dingle na sila maga-focus sa tion nga indi pa sa gihapon makita ang lawas sang solterito.
