ZARRAGA, ILOILO – Wala nadayon ang tuyo sang magpamilya sa Barangay Balud II, Zarraga, Iloilo nga magtipon-tipon kag magselebrar sa sulod sang ila nga compound pila ka adlaw antes ang Paskwa.
Sa interview sang Bombo Radyo kay Pol. Lt. Johnny Arnad, OIC chief of police sang Zarraga Municipal Police Station, iya ginpahayag nga kagab-i, Disyembre 20, ginkadtuan sang barangay officials kag sang personnel sang Zarraga Municipal Police Station ang amo nga compound agud mapauntat ang aktibidad.
May ginset-up nga mini sound system kag dancing lights ang pamilya. Masobra pulo ka kabataan suno kay Arnad ang nagahanda sang ila nga party.
Suno kay Arnad, wala man sang mga bisita nga halin sa iban nga lugar bangud magpakaisa man lang sa amo nga compound ang nagkitaay kag nagtuyo nga mag-disco.
Wala pa nakaumpisa ang okasyon sang nag-abot ang otoridad.
Panugyan ni Arnad sa publiko, likawan anay ang kaangay sini nga pagtilipon subong nga holiday season bangud paglapas ini sa COVID-19 protocols sang Iloilo Provincial Government.
