Indi pa matumod sang Oton Municipal Police Station ang identity sang duha ka senior citizens nga nasapwan nga
nagahuray-ad kag wala na sang kabuhi sa sulod sang isa ka balay sa Barangay Botong, Oton, Iloilo, Disyembre 26.
Nakit-an ang driver’s license sa crime scene nga napangalan kay Antonio Cabanatan nga taga-Panay, Capiz.
May yara man sang iban nga IDs nga nakabutang ang ngalan nga Pastor Cabanatan kag may yara man sang addresses nga Samar kag Cebu.
Sa interview sang Bombo Radyo kay Punong Barangay Rehum Torre sang nasambit nga lugar, iya ginpahayag nga una
nakit-an sang isa ka bata ang tigulang nga lalaki, ginabanta nagaedad 75-80 anyos, kaina sang aga nga nagahigda sa terrace sang amo nga balay.
Sang ginpadulungan sang mga pulis, nakit-an man ang babaye, ginabanta nagaedad 55-60 anyos, nga yara nagahuray-ad sa sulod sang kwarto.
Ang duha ka biktima ang lunsay nakitaan sang bagras sa lawas kag kamot kag may agi sang hinigtan sa ila nga liog.
Hugot ang mga pagpati sang opisyal nga ginkuga gamit sang wala matumod nga higot ang liog sang duha ka biktima.
“INDI KILALA SANG MGA KASILINGAN”
Ang balay nga gintabuan sang krimen ang madugay na nga ginapa-arkilahan lang bangud nagapuyo sa isa ka subdivision sa Oton ang matuod nga tag-iya.
Sa ihibalo sang punong barangay, ulihi nga may nag-arkila sa amo nga balay sang bulan sang Nobyembre kag nagbayad
man sang renta sang Disyembre, Alyas Jessie ang pangalan, apang wala sang address nga ginbilin.
Gin-athag man sang Punong Barangay nga halin sang una tubtob sa adlaw nga natabo ang krimen, wala gid nila nakit-an ang duha ka senior citizens nga yara sa ila nga lugar.
Suno kay Torre, wala man sila nakamutik nga may nagaistar nga senior citizens sa amo nga balay bangud wala man sila nagaguwa-guwa.
Sang 11:30 sang gab-i antes ang krimen, may nakit-an pa ang ila kasilingan nga isa ka puti nga van kag isa ka motorsiklo naghalin sa amo nga balay.
Wala sang komosyon nga nabatian, wala sang pagbinaisay, kag wala sang anuman nga gahod nga nabatian halin sa balay bisan ginabanta 20 metros lang ang kalayuon sang masunod nga balay.
Blangko man ang mga kasilingan kun sin-o gid ang duha ka tigulang, kun taga-diin sila, kag kun ngaa ginpatay sila.
Posible suno sa punong barangay nga may nahimo nga sala ang duha ka tigulang sa ila matuod nga lugar kag nagpalagyo lang kuntani sa ila nga barangay.
INDI PA MATUMOD ANG MOTIBO
Padayon man subong ang imbestigasyon sang Oton Municipal Station.
Sa interview sang Bombo Radyo kay Police Staff Sergeant Alex Esteves, imbestigador sang Oton Municipal Police
Station, iya ginpahayag nga indi pa nila matumod pati ang motibo sa krimen.
Wala man nagaukay ang iban nga gamit sa sulod sang balay gani indi makumpirma kun pangawat ang motibo sang suspek.
Magluwas sa IDs, may nakit-an man nga wallet kag libro sa amo nga balay nga posible ginapanag-iyahan sang mga biktima.
Nagapakig-angot man ang pulis sa addresses nga nakit-an sa IDs agud mapat-od kun taga diin gid ang mga biktima.
Pati ang ulihi nga nag-transact agud mag-arkila sa amo nga balay ang dala man sa imbestigasyon.
Bantayi ang dugang nga detalye sa Bombo Radyo Iloilo.
