Ginkumpirma ni Calinog Mayor Francisco Calvo nga mga anay miyembro sang New People’s Army ang iban nga mga residente nga nagsungka sa otoridad sang damlag lang.
Ini ang kasunod sang joint operations sang mga pulis kag militar sa Calinog, Iloilo kag Tapaz, Capiz sang Disyembre 30 kun sa diin ginserbehan sang search warrants ang ginaalegar mga miyembro sang rebelde nga grupo.
Sa interview sang Bombo Radyo kay Mayor Calvo, iya ginpahayag nga sang 1980s pa kag 1990s pa nangin kabahin sang rebelde ang amo nga mga residente apang wala na subong sang kahilabtanan sa NPA.
Ang iban sa ila ang nangin volunteers sang NPA, runners, kag supporters.
Sa Barangay Garangan, 15 ang nagsungka lakip na si Fortunato Legario, ang isa sa ginserbehan man sang search warrant sang Disyembre 30 apang una na ginpahayag sang pulis nga nakapalagyo.
Sa Barangay Masaroy, kapin 83 ka mga pumuluyo ang nagsungka kag nagpangayo sang bulig sa ila nga punong barangay.
Lunsay nagpahayag sang kahadlok kag katahap ini nga mga pumuluyo nga basi kun matabo man sa ila ang natabo sa Tapaz, Capiz kun sa diin siyam ang patay sang ginserbe sang Criminal Investigation and Detection Group Region VI ang search warrant.
Ginpadiretso sa kampo sang 12th Infantry Battalion-Philippine Army ang mga nagsungka.
May yara man nga nahadlok nga magpauli sa ila balay sa bukid gani nga nagtinir na lang sa ila nga mga himata sa banwa.
Subong nga adlaw, Enero 5, ginalauman nga may mga residente pa gikan sa duha ka barangay nga magasungka sa otoridad.
