ILOILO CITY – Ginapasigurado sang mga opisyal sa Barangay Nabitasan, La Paz, Iloilo City nga mahinalungon ang ila nga mga pumuluyo agud malikawan ang pagluntad sang sunog.
Sa interview sang Punong Barangay Barbie Aroza, iya ginpahayag nga masami nga ginapahanumdom ang mga residente nga i-check ang ila mga gina-charge nga mga gadget kag indi pagpabay-an ang mga gamit ilabi na kun nagagamit sang kuryente.
Suno pa kay Aroza, mas ginpabaskog man ang ila nga kampanya batok sa iligal nga koneksyon agud nga malikawan ang short circuit.
Ginpahayag man ni Aroza nga nakahatag sang leksyon sa mga pumuluyo ang natabo sa ila nga barangay sang nagligad nga Enero 23, 2010 kun san-o natabo ang isa sa pinakadaku nga sunog sa syudad sang Iloilo.
Matandaan nga sang amo nga petsa, patay ang isa ka tigulang, masobra 100 ka balay ang natupok sang kalayo, kag masobra P1 million ang balor sang halit sang nagluntad ang sunog sa isa ka residential area samtang nagapanghanda ang syudad para sa Dinagyang Festival.
