Nagapanindugan ang Vallacar Transit Incorporated nga wala ginatolerar sang kumpaniya ang drivers sang ila bus units nga wala nagapatuman sng husto nga minimum health protocols batok sa COVID-19.
Sa interview sang Bombo Radyo kay Jade Seballos, media relations officer sang Vallacar Transit Incorporated, iya ginpahayag nga may mga bus drivers na nga nasuspinde sa trabaho bangud sang pagpabaya sa mga pasahero nga nagalapas sa mga protocol.
Partikular nga gintumod ni Seballos ang physical distancing nga suno sa iya “istrikto nila nga ginapatuman” santo sa pagsulundan sang gobyerno.
Ini ang pahayag ni Seballos sa pihak sang reports nga nagapahayag nga nagaginutok ang mga pasahero kun magpauli sa mga banwa sa probinsya kag wala nagasunod sa physical distancing.
Gin-ako ni Seballos nga indi na nila ang mamonitor ang mga bus kun makalarga na ini halin sa terminal.
Gani panawagan niya sa publiko, kun makit-an nga puno ang bus, mas maayo nga kuhaan sang picture ang bus number kag isend sa ila talatapan agud mahatagan nila sang nagakaigu nga akto kag imbestigasyon.
May kaangtanan naman sa mga reklamo nga amo man sa gihapon kamahal ang ginabayad sang mga pasahero apisar gutok ang ginasakyan nga bus, ginpahayag ni Seballos nga nagasunod lang sila sa fare matrix sang gobyerno.
Suno sa natungdan, wala sila ginapahanugutan nga magpasaka ukon magpanubo sang plete kun wala sang mandu ang Land Transportation Franchising and Regulatory Board ukon LTFRB. #
