Wala pa sang pinal nga sabat ang kadam-an sang mga negosyante sa syudad sang Iloilo may kaangtanan sa panawagan ni Iloilo City Mayor Jerry Treñas para sa mass vaccination batok sa COVID-19.
Matandaan nga una na nag-apelar sang bulig si Mayor Treñas sa pribado nga mga kumpaniya nga sabton na lang ang libre nga pagpabakuna sa ila nga mga empleyado agud mabuhin-buhinan ang palas-anon sang gobyerno.
Sa interview sang Bombo Radyo kay Lea Lara, executive director sang Iloilo Business Club, iya ginpahayag nga nakapatigayon na sila sang duha ka short meetings apang wala pa siya sang ginpahayag nga kumpirmasyon ukon pagpamatok halin sa business sector.
Suno kay Lara, regular man ang pagpakig-angot sa ila sang alkalde agud maupdate may kaangtanan sa procurement sang COVID-19 vaccines kag iban pa nga scheme sang Iloilo City Government.
Madamo pa sang mga factor nga dapat ikonsidera suno sa natungdan kaangay na lang ang mga dalagku nga kumpaniya nga may mga branches nga naga-operate diri sa syudad sang Iloilo kag posible man nga may kasugtanan na sa ila mismo talatapan.
Positibo ang natungdan nga apisar wala pa natapos ang pagpangusisa sa mga dokumentro, maga-coordinate kag maga-cooperate ang mga negosyante sa Iloilo City Government.
May kaangtanan naman sa mangin palaabuton sang business sector sa 2021, ginpahayag ni Lara nga isa ka maayo nga panugod ang pagpaidalom sa syudad sa modified general community quarantine ukon MGCQ subong nga bulan sang Enero.
Tion man ini suno sa iya nga magadamo ang domestic transactions kag mabuligan nga makabawi ang lokal nga mga negosyo.
Apisar ginapanan-aw nga indi na makabalik sa pre-pandemic operation ang business sector, nagalaum ang natungdan nga makabangon na ang mga negosyo, turismo, kag transportasyon samtang wala man ginabalewala ang mga protocol batok sa COVID-19.
