Dapat nga himuon nga kinaiya ang pagka-time conscious.
Ini ang panugyan sang isa ka certified life coach, clarity coach, motivational speaker kag optometrist nga si Dr. June Acebedo.
Sa interview sang Bombo Radyo kay Acebedo, iya ginpahayag nga ang pagka-time conscious sang isa ka tawo ang makabulig sa iya nga malab-ot ang mas daku nga mga oportunidad nga iya ginalagas; samtang ang pagpabuyan-buyan naman ang mahimo magdulot sang negatibo nga epekto.
Ang pagka-time conscious ang tanda man sang pagrespeto sa iban bangud mahimo mausik ang ila tyempo kun maghulat sa isa ka tawo nga masami late.
Panugyan pa ni Acebedo, mas maayo nga regular nga maghimo sang check-list ukon to-do list agud mapasunod ang importante nga mga hilimuon sa sulod sang isa ka adlaw.
Mas maayo man nga mag-set sang alarm sa cellphone agud mapahanumdom ang kaugalingon nga maghulag sang mas temprano.
Ini nga mga simple nga panugyan ni Acebedo ang may kaangtanan sang pag-oberbar sa National Time Consciousness week sa kada una nga semana sang tagsa ka tuig sa Pilipinas.
