Nagdangat na sa kapin 550,000 ka doses sang COVID-19 vaccine ang na-administer sa Italya — isa sa mga pungsod sa kalibutan nga may pinakamataas nga kaso sang COVID-19.
Santo sa latest data sang health authorities, sa masobra 900,000 ka doses sang Pfizer/BioNTech vaccine nga gin-deliver sa Italya sang nagligad nga Disyembre 27, masobra na sa 55% ang natigayon nga ma-inject.
Bangud sini, nagapanguna na ang Italya sa mga pungsod sa European Union sa may pinakamataas nga numero sang natublok nga bakuna.
Suno kay Bombo International Correspondent Jovito Sumabong direkta sa Rome, Italy, prayoridad subong sa vaccination ang mga medical staff kag ang vulnerable sector.
Wala man sang pilitay nga nagakatabo sa ila nga pungsod suno kay Sumabong.
Pahayag ni Sumabong, target sang Italian government nga maka-vaccinate sang anum ka milyon nga mga tawo sa katapusan nga bahin sang Marso; 14 ka milyon sa katapusan nga bahin sang Abril; kag malikop ang populasyon sang bug-os nga pungsod sa bulan sang Agusto.
Magluwas sa bakuna sang Pfizer, ginalauman man sang Italian government nga makaumpisa na ang pagbakuna gamit ang Moderna vaccine sa una nga quarter sang tuig.
Nahibaluan nga nagapang-walo ang Italya sa bilog nga kalibutan sa may pinakamataas nga numero sang COVID-19 cases.
Santo sa record sang health authorities, ang Italya ang may yara sang 2,257,866 ka kaso sang COVID-19; 78,394 ka patay; kag 1,606,630 ang nakarecover.
