ILOILO – Nagpain na sang kaugalingon nga pondo ang local government unit sang Ajuy agud nga ibakal sang COVID-19 vaccine nga amo ang libre nga ihatag sa mga pumuluyo sang banwa.
Sa interview sang Bombo Radyo kay Ajuy Mayor Jett Rojas, iya ginpahayag nga P10 million ang budget sang banwa kag may yara na ini sang resolution halin sa Sangguniang Bayan.
“Ginsuptan naton ina agud nga makabakal man kita sang aton. Daku ang problema sa COVID kag indi man pwede nga i-rely naton tanan sa national government,” pahayag ni Rojas.
Bakuna sang AstraZeneca ang ginalantaw nga iga-procure sang nasambit nga banwa.
“P10 million ina ang budget, available na ang ina nga pondo for the purchase of COVID-19 vaccine. We prefer ang iya sang AstraZeneca. Ihatag naton ina sang libre sa aton nga mga pumuluyo kay at the end of the day, ila man ini kwarta. Gusto gid naton sila nga maproteksyunan,” dugang nga pahayag sang alkalde.
Ginalantaw nga masobra 5,000 ka mga tawo ang mangin recipients sang bakuna.
Nagapanguna sa priority list amo ang mga frontliners, vulnerable sector, kag mga tawo nga may comorbities.
Hingyuon pa ni Rojas kay Iloilo Governor Arthur Defensor, Jr,. nga idungan na lang sang Ajuy sa Iloilo Provincial Government ang pagbakal sang bakuna.
Matandaan nga kahapon, Enero 10, sang nagpirma sang provincial government sang multilateral agreement para sa advance purchase sang AstraZeneca AZD 1222 vaccines.
