ILOILO – Magasapol ang mga alkalde sang mga banwa sa probinsya sang Iloilo agud nga maistoryahan ang pagpatigayon sang COVID-19 vaccination sa probinsya.
Ini ang kasunod sang pagpirma na sang Iloilo Provincial Government sang multilateral agreement para sa advance purchase sang 270,000 doses sang AstraZeneca COVID-19 vaccines.
Sa interview sang Bombo Radyo kay San Enrique, Iloilo Mayor Trixie Fernandez nga nagaserbe man nga Presidente sang League of the Municipalities of the Philippines – Iloilo Chapter, iya ginpahayag pangunahan ni Iloilo Governor Arthur Defensor, Jr. ang meeting bwas, Enero 12.
Suno kay Fernandez, posible man nga istoryahan ang dugang nga plano sang mga local government units nga magbakal sang COVID-19 vaccine.
Apisar wala pa sang konkreto nga detalye nga nahatag, nagpahayag si Fernandez nga nagapati siya nga nagpain man sang kaugalingon nga pondo ang tagsa ka LGU para sa pagbakal sang bakuna kag mahimo magamit para makabulig sa provincial kag national government.
Una diri, nagpahayag na ang Ajuy LGU nga may yara sila sang P10 million nga budget para sa bakuna.
Suno naman kay Fernandez, para sa banwa sang San Enrique, may natigana naman nga P1 million para sa pagbakal sang bakuna.
Unahon man ang mga health frontliners, municipal employees, kag vulnerable sector suno kay Fernandez.
“Ngaa abi indi if it will help us and protect us from COVID-19?” sabat sang alkalde sa pamangkot kun handa man siya nga magpabakuna batok sa nasambit nga balatian.
