Lima ka butang ang ginapanawagan sang mga obispo sa Western Visayas kasunod sang Disyembre 30 nga simultaneous joint operations sang pulis kag militar sa Tapaz, Capiz kag Calinog, Iloilo.
Matandaan nga sa amo nga operasyon, siyam ang patay kag 17 ang gin-aresto bangud santo sa alegasyon sang pulis, ang mga subject sang mga operasyon ang miyembro sang rebelde nga grupo kag nagbato sa otoridad.
May mga nagapanindugan naman nga ang mga napatay kag gin-aresto amo ang nga lider sang grupo nga Tumandok nga Mangunguma nga Nagapangapin sang Duta kag Kabuhi ukon mas kilala nga TUMANDUK nga amo man ang hugot nga nagapamatok sa mega dam project sang gobyerno.
Kasunod sini, yari ang mga ginapanawagan sang Simbahang Katolika santo sa ila pastoral letter nga gin-release kahapon, Enero 15:
1. Maid-id nga imbestigayon nga patigayunon sang INDEPENDENT BODY agud mahibaluan kun ano ang natabo sang amo nga adlaw;
2. Pagpamati sa apelar sang mga TUMANDOK kag sa ila rason kun ngaa ginapamatukan nila ang pagtukod sang Jalaur Mega Dam;
3. Pag-untat sang militarization sang IP communities;
4. Pagsunod sa ethical standards sa tion nga ginapatigayon ang police kag military operations; kag,
5. Pag-require sa mga pulis nga magsuksok sang body camera kun magpatigayon sang operasyon agud may pamatuod batok sa sala nga akusasyon.
Sa interview sang Bombo Radyo kay Msgr. Meliton Oso, director sang Jaro Archdiocesan Social Action Center, iya ginpahayag nga hugot nga ginakondenar sang Simbahan ini nga klase sang pagpamatay.
Ginapanawagan man sa publiko suno kay Oso nga ikondenar ang kalakasan kag kalautan nga ginahimo mismo sang otoridad.
“Daku ang salabton ta kun magpa-apa apa kita. Daku salabton ta kun magpabungol-bungol kita. Amo ini ang panawagan ko sa isig ko ka Katoliko, isig ko ka Kristiyano: obligasyon naton nga magdepensa sa kabuhi kag sa kinamatarong sang aton nga isigkatawo. The moment nga maghipos kita kag magpabungol-bungol kita, we betray Jesus Christ,” pahayag ni Oso.
Lakip sa nagpirma sa pastoral letter amo sanday Cardinal Jose Advincula sang Capiz, Archbishop Jose Lazo sang Jaro, kag bishops Marvyn Maceda sang San Jose de Antique, Patricio Buzon sang Bacolod, Gerardo Alminaza sang San Carlos, Louie Galbines sang Kabankalan, Jose Corazon Tala-oc sang Kalibo, kag Narciso Abellana sang Romblon.
Ang pastoral letter ang basahon sa tanan nga Simbahan sa Western Visayas sa maabot nga Enero 24.
