ILOILO – Nag-abot na sa Janiuay, Iloilo ang bangkay sang isa ka Ilonggo nga kabahin sang Philippine Air Force kag lakip sa mga napatay sang nagtibusok ang ginasakyan nga helicopter sang Sabado sang hapon, Enero 16, sa probinsya sang Bukidnon.
Ang biktima amo si Airman 1st Class Stephen Agarrado, tumandok sang Sitio Ermita, Barangay Bongol, Janiuay.
Matandaan nga sa natabo nga crash sa Impasug-ong sa Bukidnon, pito ang mga ginbawian sang kabuhi — duha ka pilots, duha ka crew members, isa ka miyembro sang Philippine Army kag duha ka miyembro sang Citizen Armed Force Geographical Unit (CAFGU).
Maga-deliver kuntani sila sang suplay sa tropa sa 8th Brigade patrol base sang Philippine Army apang bangud sa ginapahayag nga mechanical malfunction, natabo ang insidente.
“DESTINY SA PAF”
Halos indi pa mabaton sang pamilya kun ano ang natabo kay Agarrado.
Sa interview sang Bombo Radyo kay Juarlito, amay ni Agarrado, iya ginpahayag nga 10 ka tuig pa lang sa serbisyo sa Philippine Air Force ang iya anak.
Agot siya sa anum ka mga mag-utod, kilala nga “mabuot kag masinadyahon”, kag nursing graduate sa Iloilo Doctor’s College sang 2009.
Matapos ang iya graduation, nagkuha siya sang exam sa Philippine Air Force — butang nga ginapatihan sang iya nga pamilya nga amo ang iya “destiny”.
May asawa si Agarrado kag duha ka mga anak.
“Masubo ako, pero daw nalipay man. Masubo nga patay na ang akon nga anak, pero naghagan-hagan ang pamatyag ko kay bisan paano, narecover ang iya nga bangkay,” pahayag ni Juarlito.
“Kun madumduman ko gani, nagasakit gid ang dughan ko. Daw malipong ako kag nagatumbo-tumbo ako. Kun kis-a, gasinggit ako,’tani ako na lang ang gin-una kay tigulang na ako…ikaw ya, may bata ka pa nga gamay!’,”pahayag naman sang iloy nga si Elsie.
RESPONSABLE NGA AMAY
Antes natabo ang insidente pasado 2:00 sa hapon sang Sabado, nakatawag pa si Agarrado kag proud bangud sang amo nga tion, nagpagunting ang iya anak sa barber shop.
Alas 4:00 sa hapon, isa ka tawag ang nabaton sang utod ni Agarrado halin sa commander: “Wala na si Pen-pen. Indi ako kabalo kun sin-o ang una ko nga sugidan,” pahayag sang utod ni Agarrado.
“I REALLY LOVE MY JOB”
Dedikado sa serbisyo si Agarrado. Wala na sang iban nga labi nga makapamatuod sini kundi ang iya asawa, si Sheryl.
“Naghambal siya sa akon kato, ‘kun madula ako kag kun mag-crash ang helicopter, isipon mo nga happy ako nga nadula ako because I really love flying, I really love my work,” pahayag ni Sheryl.
Sa exclusive interview sang Bombo Radyo kay Sheryl, iya ginpahayag nga madugay na nga nakahibalo ang iya bana kun daw ano ka delikado ang iya nga trabaho — rason nga masami man ini nagapahanumdom sa iya asawa nga kun mapatay siya, “mapatay siya sa ngalan sang serbisyo sa iya nga pungsod”.
“Ginahambalan ko siya kun kis-a nga kun ano ang matabo, malumpat siya para makaluwas siya. Ang siling ya, indi siya pwede makalumpat kay indi niya pagbayaan ang mga upod niya,” panugiron sang asawa kag dugang niya, saksi siya kun daw ano kahugot ang bond ni Agarrado sa iya mga kaupod sa PAF nga ginakabig niya nga iya mga utod.
Pahayag ni Sheryl, nagalahog pa si Stephen nga kun mapatay siya, makabig siya nga ‘hero’. “Ang sabat ko sa iya, ‘indi ko kinahanglan ang hero nga bana. Ang kinahanglan ko buhi nga bana kay kinahanglan ka pa sang imo mga bata’.”
Isa man si Stephen sa mga maisog nga personnel sang PAF nga nagadul-ong sang suplay sa tropa sang militar sang natabo ang lima ka bulan nga kinagamo sa Marawi City sang 2017 bangud sang kalakasan sang Daesh-inspired terrorist nga Maute group.
“Proud gid na siya nga may ara siya medal nga hero of Marawi.”
Subong nga patay na si Stephen, nagatalangison si Sheryl para sa iya kaugalingon kag para sa ila nga mga kabataan.
“Nadula ang bana ko but napatay siya while serving his country kag nagaobra siya sa iya nga dream job. Ang naga-comfort sa akon amo ang ginapanghambal niya sadto. Gina-try ko nga intindihon pero indi ko pa maintindihan,” hibubun-ot sang asawa. “Indi nila ma-experience ang love sang Father. Indi nila ma-enjoy ina — indi nila makit-an kun ano kabuot ang ila nga tatay,” dugang pa ni Sheryl nga nagatumod naman sa iya nga balatyagon sa pagpadaku sa iya duha ka anak nga wala na sang amay.
Natalana nga ilubong si Agarrado sa Pebrero 15, 10:00 sa aga.
