Padayon pa nga ginahibalo sang Sta. Barbara Municipal Police Station ang matuod nga motibo sa likod sa pagpangluthang sa duha ka empleyado sang Department of Public Works and Highways (DPWH) 4th District Engineering Office sa Brgy. Bolong Oeste Sta. Barbara, Iloilo.
Matandaan nga sa natabo nga insidente kaina sang aga, maswerte nga nakaluwas sanday Engr. Eva Bedonia, pinuno sang Quality and Assurance Section sang 4th Engineering District sang DPWH kag driver nga si Rogelio Serilo Jr.
Pakadto na kuntani ang duha sa opisina sang ginpaarakan-luthang ang ila service vehicle.
Una na ginpahayag nga posible si Engineer Bedonia ang target sang riding-in-tandem suspects bangud may lima ka igu sang bala sa passenger side sang pick-up kun sa diin nagapungko ang engineer.
Sa interview sang Bombo Radyo kay Police Major Raymond Celoso, hepe sang Sta. Barbara MPS, iya ginpahayag nga ginausisa pa subong sang mga pulis kun may kaangtanan anuman nga daan nga hiligut-anon ang rason ukon may kaangtanan man sa away sa duta ni Bedonia.
Wala pa ginplastar kun ano partikular ang problema sa duta bangud kuhaan pa sang statement si Bedonia.
Wala man ginadula sang mga pulis ang kaangtanan sang insidente sa trabaho ni Bedonia, apisar santo sa ila una nga mga imbestigasyon, wala man sang kaaway sa iya trabaho si Bedonia.
Posible man suno kay Celoso nga gin-hire lang ang mga suspek bangud indi sila ma-identify sang ila nga target.
May mga laragway man nga ipakita kay Bedonia agud makabulig identify sa duha ka mga suspek.
Una naman nga napadala sa crime laboratory sa Police Regional Office 6 ang mga bala nga nasapwan sa crime scene.
