ILOILO CITY – Nagapaninguha ang COVID-19 response team sang Iloilo City Government nga makapakig-angot sa Ilongga nga isa sa bag-o lang gin-anunsyar sang Department of Health nga nagpositibo sa UK variant sang coronavirus.
Sa interview sang Bombo Radyo kay Jeck Conlu, COVID-19 spokesperson sang syudad sang Iloilo, iya ginpahayag nga santo sa una nga impormasyon nga napagwa sang Department of Health, residente sang Jaro, Iloilo City ang pasyente, gin-isolate sa San Juan, Metro Manila, kag nadischarge sang Enero 9.
Suno pa kay Conlu, naghalin sa Lebanon ang pasyente sakay sa Philippine Airlines flight PR 8661 kag nag-abot sa Manila sang Disyembre 29.
Sa subong, may negative result na nga ginauyatan ang nasambit nga pasyente kag natapos na ang mandatory quarantine.
Sang nag-abot ang nasambit nga returning overseas Filipino sa Iloilo, nagdiretso ini sa banwa sang Leon sa baylo nga sa distrito sang Jaro.
Apisar sini, may marching order si Iloilo City Mayor Jerry Treñas sa COVID-19 team nga kontakon ang pasyente kag ang iya nga pamilya diri sa distrito sang Jaro, Iloilo City agud masigurado nga husto ang mga impormasyon nga nakuha sang syudad.
Nagpasalig man si Conlu nga hugot ang monitoring sa mga point of entries sa syudad sang Iloilo agud makapanagang batok sa bag-o kag mas makalalaton nga variant sang COVID-19.
