ILOILO CITY – Isa ka tuig lang ang mahimo mahatag ni Iloilo City Councilor Jojo Javellana para sa prangkisa nga ginahingyo sang United Association of Cockpit Owners and Operators of the Philippines Incorporated para sa pagpatigayon sang online bulang sa syudad.
Sa interview sang Bombo Radyo kay Javellana nga amo ang chair sang Committee on Games, Amusement, and Professional Sports sa Iloilo City Council, iya ginpahayag nga ang iya committee report ang ipresentar pa sa konseho sa masunod nga semana kag nakadepende pa kun makapasar sa iban nga mga konsehal.
Suno kay Javellana, isa lang ka tuig ang mahatag sa amo nga cockpit operator bangud yara pa sa probation ukon subject pa sa kritikal nga eksaminasyon kag evaluation.
Kun may makit-an nga mga paglapas sa pagsulundan sang syudad, bawion man ang prangkisa suno kay Javellana.
Apang kadungan sini, gin-athag ni Javellana nga ginapatuman pa sa gihapon ang Resolution 79, Series of 2020 sang Inter-Agency Task Force kun sa diin nakasaad nga ginapasugtan ang cockfighting operations sa mga lugar nga yara sa Modified General Community Quarantine apang subject pa sa istrikto nga health kag safety protocols.
Sa idalom sini nga pagsulundan, indi pwede ang in-person audience, online ukon remote betting, kag pati na ang live broadcasting ukon telecasting sang cockfights.
