ILOILO CITY – Wala-tuo nga pagdayaw ang nabaton sang Iloilo Festivals Foundation Incorporated kadungan sang pagpresentar sang pre-filmed performances sang pito ka mga tribu sa syudad sang Iloilo.
Sa interview sang Bombo Radyo kay Romel Flogen, chair sang Ilonggo Artists Festival Association kag head choreographer sang One Dinagyang, iya ginpahayag nga tuman ang ila kalipay sa nabaton nga mga komendasyon kag positibo nga reaksyon halin sa mga tumalan-aw.
Nagpasalamat man si Flogen sa 30 ka mga digital warriors nga amo lang ang nagsulit-sulit perform para sa 7 ka mga tribu.
Sa pihak sang dalagku nga mga pagpanghangkat nga ila naagyan halin sa rehearsal tubtob sa shooting, natigayon nga napakita sa publiko ang 360-Degree Dinagyang performances kag nasaksihan man pati sa luwas sang pungsod.
Kun kumpetisyon ang Digital Dinagyang suno kay Flogen, makabig ini nga tuman ka healthy bangud sa pinasahi nga kooperasyon kag pagbinuligay nga ginpakita sang tanan nga Ilonggo artists.
Suno naman kay Professor Eric Divinagracia, artistic director sang One Dinagyang, kadalag-an ini sang bilog nga Ilonggo community.
Bangud sang maayo nga mga reaksyon sa Digital Dinagyang, ginatun-an subong ang iban pa nga innovations kag ang pagpatigayon sang Paraw Regatta Festival kag Iloilo Summer Arts Festival.
