Wala sang kapasidad sang Department of Health (DOH) Region VI kag ang Western Visayas Medical Center Sub-National Laboratory (WVMC-SNL) nga makatumod ukon maka-detect sang bag-o nga variant sang coronavirus.
Sa interview sang Bombo Radyo kay Dr. Mary Jane Juanico, COVID-19 spokesperson kag pinuno sang Infectious Disease Section sang DOH Region VI, iya ginpahayag nga centralized ang pagpatigayon sang test sa mga returning overseas Filipinos (ROF) kag iban pa nga nagaabot sa Pilipinas.
Kun magpositibo sa swab test sang ROF sa Manila, gina-forward ang specimen sa Philippine Genome Center para sa genome sequencing agud matumod kun infected sila sang UK variant sang COVID-19 nga amo ang ginapahayag sang health authorities nga mas makalalaton.
Suno kay Juanico, sa Manila lang anay istrikto nga gina-quarantine ang mga ROF samtang wala pa ang resulta sang test.
Sa subong, wala pa sang detected nga UK variant sang coronavirus sa Western Visayas. Ang pagtaas sang kaso subong nga bulan suno kay Juanico ang bunga sang masangkad nga contact tracing kag kabahin pa sang ginpanan-aw na nga daan nga post-holiday surge.
Sa pihak nga bahin, santo sa latest data sang DOH, ang Pilipinas ang may 17 na ka kumpirmado nga kaso sang UK variant sang COVID-19.
Matandaan nga ginkumpirma man ni Health Undersecretary Maria Rosario Vergeire nga may yara na sang domestic ukon local transmission sang B.1.1.7 variant sang SARS-CoV-2 sa Pilipinas matapos narecord sa Bontoc, Mountain Province ang 12 ka mga kaso.
Sa subong suno sa ahensya, ang tanan nga cases nga may UK variant ang ginaangot sa mga kaso nga naghalin sa luwas sang pungsod.
