Ginahulat pa sang Department of the Interior and Local Government – Iloilo City ang kopya sang ordinansa kasunod sang pag-apruba sang Iloilo City Council sang prangkisa nga ginhingyo sang United Association of Cockpit Owners and Operators of the Philippines Incorporated sa pagpatigayon sang online nga bulang.
Sa interview sang Bombo Radyo kay Oscar Lim, Jr., officer in charge sang Iloilo City DILG, iya ginpahayag nga lantawon pa kun ano ang naplastar sa ordinansa agud nga mapasa man niya sa legal division sa regional office sang DILG.
Mas maayo suno kay Lim kun ma-define gid kun ano ang livestreaming devices.
Ini bangud pahanugutan ang nasambit nga operator nga makapatigayon sang delayed broadcast sang bulang sa diin recorded na ini antes nga i-stream online sa syudad.
Apang suno kay Lim, kun sundon ang Memorandum Circular 2020-140 sang DILG, wala sang live streaming kag public exhibition sang cockfight nga matabo.
Santo man sa Resolution 79, Series of 2020 sang Inter-Agency Task Force, ginapasugtan ang cockfighting operations sa mga lugar nga yara sa Modified General Community Quarantine apang subject pa sa istrikto nga health kag safety protocols kag indi pwede ang in-person audience, online ukon remote betting, pati na ang live broadcasting ukon telecasting sang cockfights.
