ILOILO CITY – Malapit na ang fiesta ni Nuestra Señora de la Candelaria ukon Our Lady of Candles, ang patron saint sang Western Visayas.
Ini nga selebrasyon sa distrito sang Jaro, Iloilo City ang ginabantayan gid sang mga deboto indi lamang sa Iloilo kundi sa diin man nga bahin sang Pilipinas bangud sang ginapatihan nga mga bugay nga sarang mahatag sang Marian image.
Isa sa mga deboto amo si George Susvilla, Jr., isa ka choreographer, tumandok sang Barangay Tabuc Suba, Jaro, Iloilo City nga nagatinir na subong sa banwa sang San Enrique.
“Wala na gid ako sang may nabatyagan nga sakit sa kaluoy ni Candelaria kag sang Sto. Nino. Wala gid ako nagakalipat sa pagpasalamat kag pagpangamuyo sa iya. Ang akon debosyon ara gid sa akon,” pahayag ni George nga nagapahayag nga kapin tatlo ka tuig naman umpisa sang nalampuwasan niya ang aneurysm — butang nga ginakabig niya isa ka daku nga milagro.
‘MALAPIT NA LANG AKO MAPATAY’
Sang Hunyo 2018, kabahin si Susvilla sa Tribu Panayanon nga nagkadto sa Estados Unidos para sa isa ka trip.
Sa iya pagpauli sa Iloilo, ginsugata siya sang isa ka malain nga balita — ginbawian sang kabuhi ang iya utod nga lalaki nga suno sa iya, ‘daw barkada na niya’ kag tama gid kalapit sa iya.
Bangud sang natabo, nagbatyag sang tuman nga kasubo si Susvilla: “Nakabatyag ako sang tuman kasakit sang akon ulo kun akon i-rate from 1-10, ara siya sa 9.5 nga daw pamatyagan ko mapatay na gid ako.”
Magluwas sa depression nga iya ginpahayag dala sang kamatayon sang iya utod, nagapati man si Susvilla nga nagmasakit siya bangud sa stress sa iya sunod-sunod nga trabaho bilang breadwinner sang pamilya. Indi man maayo ang iya eating habits.
“Nag-abot sa punto nga gin-mild stroke ako, nagkiwi ang akon baba, nagtiliko ang akon kamot, kag ang akon nga pihak nga lawas indi ko gid mahulag sasulod sang pila ka segundos,” pahayag ni Susvilla. Sang ginpaidalom sa CT Scan, natukiban nga may naglapta na nga dugo sa sulod sang iya ulo kag bangud sa paglaragway sang doktor nga malala na ang iya nga kondisyon, ginpahanda siya sang kapin P400,000 nga kwarta para sa operasyon nga sang amo nga tion amo lang gid ang ginpahayag nga makapalawig sang iya nga kabuhi.
“Sa pagkamatuod lang masarangan ko ang sakit pero ang mangita sang P400,000 tubtob P500,000…. wala gid ako kuhaan. Maskin ang akon maninoy nga doktor man ang naghambal nga operasyon lang gid ang makapaayo sa akon kahimtangan”.
Apang sang amo nga tion, wala gani naglab-ot sa P100,000 ang iya ginauyatan nga kwarta.
‘KUSOG-KUSOG AKON NGA PANGAMUYO’
Halos tanan sa iya palibot –abyan, pamilya, kag iban nga himata — ang nag-engganyo sa iya nga magpaopera agud nga masalbar ang iya kabuhi.
Apang ang kakulang sa kwarta, trauma sa hospital, kahadlok sa operasyon ang naghawid kay Susvilla. Labaw sini tanan, ginpatihan niya ang gahum sang pangamuyo.
“Naghapit ako sa Jaro Cathedral. Nagkadto ako kay Candelaria sa babaw kag nagkupo ako. Naghinibi ako kag siling ko diin ko ni kwaon? Ano ang himuon ko? Gin-surrender ko ang tanan sa iya.”
Suno kay Susvilla, gin-adlaw adlaw niya ang pag-ampo kay Nuestra Señora de la Candelaria. Wala siya nagdula sang paglaum nga isa ka adlaw, mabulong siya kag madala sa pangamuyo ang iya nga kondisyon.
“Adlaw-adlaw, wala gid ako naga-untat sa pagpangamuyo sa iya asta nga ang inadlaw nahimo na nga binulan. Ginhambalan ko siya nga kaluuyan niya ako kag gagmay pa ang akon mga kabaatan. Naghinibi ako sa iya atubangan nga nagapangamuyo.”
‘MILAGRO GID INI’
Makaligad ang kapin lima ka bulan, amat-amat nga nadula ang tanan nga nabatyagan niya sa iya nga lawas.
Nadula ang iya nga pagkapukol, pag-numb sang lawas, kag pagpalakit sa ulo.
“Nakabalik ako tudlo sa Dinagyang, naka-ugtas-ugtas naman ako liwat. Naka-drive ako liwat sang malawig,” emosyonal niya nga pahayag.
Ini tanan, suno kay Susvilla, ang utang niya sa Candelaria. “Wala gid ako gakalipat sa paghapit kay Candelaria. Gintudluan ko akon nga mga bata nga magpangamuyo sa iya. Wala gid ako nagakalipat sa pagpasalamat kag pagngamuyo sa iya kun ari ako diri sa siudad maskin ara pa ako sa Passi, ukon sa San Enrique ang akon pagpangamuyo kag debosyon ara gid sa akon,” pahayag ni Susvilla.
Sa subong, maayo ang iya nga lawas kag malipayon upod sa iya pamilya. Kapiestahan man sang Candelaria ukon indi, yara sa iya ang debosyon kag pagtuo — butang nga amo man ang nagsalbar sa iya sang tion nga halos nawad-an siya sang paglaum nga mabuhi.
‘INDI PA ULIHI ANG TANAN‘
Wala naman sang bata ukon tigulang para sa mga tawo nga luyag mangin deboto sang Candelaria.
Isa diri amo si Vic Aguisanda nga nagpahayag nga sang bata pa siya, nagasimba na siya sa Jaro Cathedral apang tigulang na siya sang nangin deboto ni Nuestra Señora de la Candelaria.
Ini matapos nangin news editor siya anay sang Candle Light, official publication sang National Shrine sang Our Lady of Candles.
Suno kay Aguisanda, diri niya natun-an ang matuod nga kahulugan sang pagka-Kristyano.
Subong nga nagatigulang na siya suno sa iya, contributor man siya gihapon sang publication kag may column man nga ginatawag Saint of the Week.
Ginpahayag ni Aguisanda nga indi man kinahanglan nga adlaw-adlawon gid ang pagkadto sa Jaro Cathedral.
Pwede gid suno sa iya nga sundan man ang holy rosary nga ginapalayag kada gab-i sa Bombo Radyo.
