Gin-abisuhan sang Philippine Embassy in Myanmar ang mga Pinoy nga magpabilin lang nga kalmado kag likawan ang pagbiya sa ila nga mga balay.
Ini ang may kaangtanan sa ginpatuman nga isa ka tuig nga state of emergency sa amo nga pungsod.
Ginhingyo man sa mga Pinoy nga magparehistro sa embahada kag magpa-miyembro sa Embassy township coordination group.
Sa mga Pinoy nga wala pa nakaparehistro sa Philippine Embassy, mas maayo nga magpadala sang mensahe sa embahada paagi sa Facebook page agud nga maka-connect sila sa assigned coordinator sang talatapan.
Base sa latest data sang Department of Foreign Affairs (DFA), may yara sang 1,273 ka mga Pinoy sa Myanmar.
Ginpahayag man sang Malacañang nga handa ang Pilipinas para sa posible patigayunon nga repatriation sa mga Pinoy halin sa amo nga pungsod.
Matandaan nga gindeklarar ang state of emergency sa amo nga pungsod matapos gin-detain ang lider nga si Aung San Suu Kyi kag iban pa nga senior government officials.
Ginpahayag sang militar nga kinahanglan ang stablity sa estado bangud wala na-address sang election commission sang Myanmar ang ginapahayag tuman ka daku nga iregularidad sa eleksyon sang nagligad nga Nobyembre.
