ILOILO CITY – Ginahitso pa lang ang vaccination operations plan para sa Western Visayas.
Sa interview sang Bombo Radyo kay Ma. Aletha Nogra, spokesperson sang Regional Taskforce for COVID-19, iya ginpahayag nga natumod naman ang mga ahensya sang gobyerno nga dapat magbulig kag ang ila tagsa ka katungdanan.
Suno kay Nogra, ang Department of Health (DOH) ang overall lead sa vaccine administration samtang naga-co-lead naman ang Deparment of the Interior and Local Government (DILG).
Magluwas diri, nagapangamot man ang Office of Civil Defense sa coordination kag logistics management.
May mga regular nga pagsinapol nga ginahimo suno sa natungdan agud nga mabalay gid sang husto ang plano para sa pagpabakuna sa Rehiyon VI.
Papel naman sang local government unit (LGU) ang maghanda sang requirement nga gin-set sang DOH agud mahibaluan kun sanday sin-o ang mapabakuna kag sin-o ang una nga bakunahan.
Una na ginpahayag sang DOH Region VI nga nagpatigayon na ang ahensya sang training para sa mga trainers sa Western Visayas.
Magabulig man sa information dissemination ang partner agencies kaangay sang Bureau of Fire Protection (BFP), Philippine National Police (PNP), front-line workers sa Department of Social Welfare and Development (DSWD) kag DILG contact tracers.
