ILOILO CITY – Nag-abiso ang Department of Trade and Industry-Iloilo sa publiko nga indi anay magpadasu-daso sa pagbakal sang car seats bangud wala pa sang manufacturer sa Pilipinas nga otorisado nga magbaligya sini nga produkto.
Ini ang sa tunga sang pagtaas sang pagkinahanglan sini dala sang kontrobersyal nga Child Safety In Motor Vehicles Act kun sa diin una naman ginpahayag sang Land Transportation Office nga magluwas sa mga pribado nga salakyan, ginatun-an man sang LTO nga ipatuman ang child car seat requirement sa public utility vehicles (PUVs).
Sa interview sang Bombo Radyo kay Felisa Judith Degala, director sang DTI-Iloilo, iya ginpahayag nga santo sa implementing rules and regulations sang nasambit nga layi, kinahanglan anay nga mag-secure sang certificate ang manufacturer, importer, distributor kag seller sang child restraint system halin sa DTI.
Suno kay Degala, santo sa ulihi nga advisory sang Bureau of Philippine Standards, wala pa sang local manufacturer nga nag-apply para sa amo nga certificate ukon lisensya.
May mga importers naman nga nag-apply apang subject pa sa assessment kag evaluation sang Bureau of Philippine Standards agud nga mahibaluan kun pasado ang ila nga produkto sa Philippine National standard.
Suno kay Degala, hulaton anay nga may ma-publish na ang Bureau of Philippine Standards sa ila website nga mga pangalan sang manufacturers nga authorized nga magbaligya.
Kun makaabot na sa merkado ang certified car seats, ini nga mga baligya ang may yara sang name sang manufacturer, name sang brand, kag ICC sticker ukon PS Mark nga may numero nga gin-isyu sang BPS.
Sa subong, wala pa sang suggested retail price para sa car seat bangud tun-an pa sang DTI kun makabig ini nga “prime commodity.”
