ILOILO CITY – Padayon ang kampanya sang Iloilo City Government agud nga matapna na ang paglagaw sang mga freelance sex workers nga nagapangita sang ila mga kustomer ilabi na sa Iloilo City Proper.
Sang nagligad nga gab-i, 40 ang natigayon nga nakuha sang Task Force on Morals and Values Formation gikan sa nanuhay-tuhay nga mga dalanon.
Sa interview sang Bombo Radyo kay Nestor Canong, pinuno sang Task Force on Morals and Values Formation, iya ginpahayag nga sa 40 nga ila nadakpan, 29 ang babaye, 10 ang mga lalaki, kag isa ang menor de edad.
Suno kay Canong, sinemana man ang ginpatigayon nga surveillance antes naaktuhan ang mga freelance sex workers sa mga dalanon sa Quezon, Ledesma, Arroyo, Mabolo-Delgado, Valeria, kag Mabini.
Apisar naglapas ang mga ini sa Iloilo City Ordinance 2014-377 nga amo ang nagadumili sa anuman nga sahi sang prostitusyon kabaylo sang kwarta, wala sila ginpreso kundi ginpaidalom lang sa counseling.
Ginpahangop sa mga freelance sex workers kun ano ka-delikado ang ila trabaho ilabi na bangud sang COVID-19 pandemic.
Una na ginpahayag sang task force nga bangud sa pagsirado sang night clubs kag KTV bars, freelancers na subong ang mga sex workers kag nagalagaw kun kagab-ihon.
