ILOILO CITY – Wala nag-atubang sa media si Philippine National Police (PNP) Chief General Debold Sinas kadungan sang iya pag-abot sa Camp Gen. Martin Teofilo B. Delgado, Fort San Pedro, Iloilo City subong nga adlaw, Pebrero 8.
Pagkatapos sang Police Regional Office (PRO) VI Arrival Honors, ginpatigayon na ang ‘Talk to the Men’ kag ang pagsapol sa mga personnel sang regional office.
Gintinguhaan sang Bombo Radyo kaina nga kuhaan sang pahayag si PRO VI Director PBGen. Rolando Miranda apang suno sa director, may yara pa sang ongoing nga command conference.
Antes nag-abot sa Iloilo, nagpadulong pa sa Negros Occidental si Sinas. Una na nagpahayag si Pol. Lt. Col. Joem Malong, spokesperson sang PRO VI, nga antes magbalik sa Metro Manila, may mga presentation of accomplishments, awarding of personnel, kag press conference pa nga himuon.
Apang sa inisyal nga impormasyon sang Bombo Radyo, indi na madayon ang press conference bwas, Pebrero 9, bangud may tambungan nga senate hearing si Sinas.
