Gin-revoke na sang Securities and Exchange Commission ang certificate sang incorporation kag registration sang Chiyuto Creative Wealth Document Facilitation Services OPC ukon one person corporation.
Sa Order of Revocation nga napetsahan Pebrero 15, 2021, nakasaad man nga kabug-usan nga P9 million ang kinahanglan bayaran. Kun pahat-pahaton:
— P3 million sa Chiyuto Creative Wealth Document Facilitation Services nga amo ang DTI-registered entity;
— P3 million sa Chiyuto Creative Wealth Document Facilitation Services nga amo ang one person corporation registered sa SEC;
— kag P3 million kay Patrocenio Calvez Chiyuto, Jr. aka Don Chiyuto aka Doc Don aka Don Zhang Lee Chiyuto aka Mr. Solve bilang proprietor/single stockholder-director-president sang CHIYUTO companies.
Ang nalapas amo ang Section 44 sang Revised Corporation Code of the Philippines (RCC or R.A. 11232) in relation to Sections 8.1, 28.1 kag 26.1 sang Securities Regulation Code nga amo ang:
— pagtanyag kag pagbaligya sang public unregistered securities sa porma sang investment contracts paagi sa Double-Your-Money Roulette Game Scheme;
— pag-akto bilang broker (Chiyuto/Chiyuto OPC) sa securities kag pag-akto bilang broker/salesman sa securities (Patrocenio Chiyuto Jr.) nga wala sang corresponding license ukon registration kun mag-solicit kag mag-offer sang investment sa publiko; kag
— pag-himo sang fraud kag pag-engage sa Ponzi scheme in connection sa pagtanyag kag pagbaligya sang securities sa porma sang investment contract paagi sa Double-Your-Money Roulette Game Scheme.
Sa interview sang Bombo Radyo kay Atty. Russel Ildesa, director sang SEC Region VI, iya ginpahayag nga administrative penalties pa lang ini kag may yara pa sang criminal case nga i-endorse ang SEC sa Department of Justice.
Tapuson lang suno kay Ildesa ang pagtipon sang ebidensya.
Suno kay Ildesa, kun indi mabayaran ni Chiyuto ang administrative fine, mahimo siya nga arestuhon.
Bangud sini, maathag na suno kay Ildesa nga wala na sang payout nga matabo. “Kay na-revoke na ang registration, wala na sang payout nga madayon. Kun ma-pay in sila, that’s a violation of CDO (cease and desist order).”
Padayon ang pag-engganyo ni Ildesa sa mga natuntohan nga investors nga mag-file sang pormal nga reklamo sa SEC ukon sa NBI.
“Ang ma-advise ko lang sa mga nag-invest dira… kun may plano sila nga bawion ang ila nga investment, file sila sang affidavit complaint either sa SEC ukon sa NBI para mapasakaan sang kaso kay ang korte lang ang makauli kag makabalik sang ila nga investment,” pahayag ni Ildesa.
“Sa mga investors, indi na gid kamo magpati sa mga ginahambal ni Chiyuto kay revoked na ang iya corporation so STOP na gid ang operation nila,” dugang pa sang regional director.
