ILOILO – Ginapanginwala sang suspek sa natabo nga strafing incident sa Sitio-Catmon Barangay Calansanan I, Badiangan, Iloilo nga siya ang nagpaarak sang luthang kag nakapatay sa 11 anyos nga bata nga babaye.
Matandaan nga ang gin-aresto sang otoridad amo si April John Valle, 33, residente sang amo nga lugar, bangud ginapahayag nga may mga nakasaksi nga siya ang responsable sa krimen kun sa diin gintunaan sang kamatayon sang biktima nga si Mary Jane Yocogco Jano Alyas Poypoy.
Sa interview sang Bombo Radyo kay Valle, iya ginpahayag nga wala siya nakapalapit sa crime scene sang amo nga gab-i bangud yara lang siya sa balay sang iya utod kag kaupod man niya ang iban niya nga mga utod.
Suno pa kay Valle, wala man siya sang ginahuptan nga armas.
Gin-ako ni Valle nga antes ang strafing incident sang amo nga gab-i, nakaengkwentro niya si Richard Yocogco, tiyo sang biktima.
Sa alegasyon naman ni Valle, matuod nga naghalin sa party balloon ang away sa tunga niya kag sang grupo ni Yocogco.
Ginapahayag nga may napulot nga pungpong sang balloon sanday Yocogco nga ginkainteresan man ni Valle tubtob nga naglab-ot sa binaisay kag tuk-apanay.
Gin-settle man sa pulis ang ila nga gamo tubtob nga ginpapauli sila sa ila nga mga balay.
Suno sa suspek, wala na siya nagdumot sa grupo nanday Yocogco bangud ‘settled’ na sila.
Indi mahangpan ni Valle kun ngaa siya ang pasibangdan ni Roberto Jano Jr., amay sang biktima, bangud magpakaduha man lang sila kag wala siya sang motibo nga magpamatay.
Handa si Valle nga atubangon ang kaso nga Murder nga amo ang ipasaka sa iya subong nga adlaw, Pebrero 16.
