ILOILO – Daku nga pagpanghangkat para sa Commision on Elections (COMELEC) ang pagganyat sa publiko nga magparehistro na para sa nagahilapit nga May 9, 2022 national and local elections.
Suno kay anay COMELEC Commissioner Gregorio Larrazabal, indi lang manubo kundi tuman gid ka nubo ang voter registration turnout.
Kun basehan ang record sang COMELEC, 863,309 lang ang registrants sa bilog nga pungsod sang nagligad nga tuig apisar nag-umpisa ang registration sang Setyembre 1, 2020.
Gintudlo nga rason ang COVID-19 pandemic nga amo ang nagapugong sa mga tawo nga maggwa sa ila nga mga balay bangud nahangawa sila nga malatnan sang balatian.
Isa pa suno kay Larrazabal amo ang uyaya nga batasan sang mga Pinoy nga nagahulat pa sang deadline antes maghulag kag magparehistro.
Suno sa natungdan, dapat mahangpan sang publiko nga apisar may pandemya, madayon gid ang eleksyon bangud sa pagkamatuod, nahimo na ini sang iban nga dalagku nga mga pungsod apisar sang kabudlay dala sang pandemya.
Suno pa kay Larrazabal, kun may panahon gani nga magkadto sa grocery shop ukon magpa-bangko, dapat nga may tion man nga magparehistro.
Imposible naman suno kay Larrazabal nga i-ban ukon dumilian ang face to face campaign.
Ini ang may kaangtanan sa plano sang Comelec nga dumilian ang face-to-face camapaign para sa May 2022 elections bangud sang pagpamahog sang COVID-19 pandemic.
Una na ginpahayag ni COMELEC spokesperson James Jimenez nga may yara sang pagbag-o sa campaigning landscape sa palaabuton nga eleksyon.
Suno naman kay Larrazabal, mas concerned siya sa local elections bangud madamo nga kandidato ang wala man sang kwarta gani naga-gwa gid sila kag mag-istorya sa mga tawo.
Kun buot suno sa natungdan, limitahan lang ang numero sang mga tawo nga magtambong sa rallies, i-disinfect ang mga venues, kag ipatuman ang mga safety measures nga santo sa pagsulundan sang National Inter-Agency Task Force.
