ILOILO – Daw kaangay lang sa pagpanagang sa COVID-19 ang pagpangudal sang probinsya sang Iloilo agud indi makasulod ang African Swine Fever ukon ASF.
Kasunod sang kumpirmasyon sang Department of Agriculture nga nakasulod na sa Eastern Visayas (partikular na sa Leyte kag Masbate) ang ASF, doble man ang pag-alerto sa mga banwa sa probinsya sang Iloilo ilabi na sa Quinto Distrito agud mabantayan ang mga pantalan.
Sa interview sang Bombo Radyo kay Concepcion Mayor Dr. Raul Banias, iya ginpahayag nga kinahanglan siguraduhon sang mga barangay officials nga wala sang fishing vessel nga halin sa Masbate nga makadungka sa ila nga mga pantalan.
Paathag ni Banias, may mga manugpangisda nga taga-Masbate nga nagabaligya sang ila produkto sa Carles kag Estancia.
Ang transport system amo ang ginakahangaw-an nga makapasaylo-saylo sang virus bangud posible makatapak ang isa ka tawo sang virus halin sa Masbate kag madala ini sa Iloilo.
Naghingyo man ang mga LGUs sa Northern Iloilo sa Department of Agriculture nga mapabulig bantay sa Philippine Coast Guard kag Bureau of Fisheries and Aquatic Resources.
Gin-athag ni Banias nga ini kabahin lang sang pag-proteher man sa multi-billion swine industry sang Iloilo Province.
Sa subong wala pa man sang namonitor ang mga LGUs nga may nagapalusot sang mga pork products nga halin sa Eastern Visayas kag iban pa nga ASF-affected areas sa Pilipinas.
