ILOILO – Nakaalerto na ang mga ahensya sang gobyerno sa Western Visayas bilang kabahin sang pagpanghanda sa posible paglaslas sang Bagyo Auring.
Sa interview sang Bombo Radyo kay Ma. Aletha Nogra, Disaster Risk Reduction and Management Division Chief sang Office of the Civil Defense Region 6, iya ginpahayag nga naka-Red Alert status ang bilog nge emergency operations center sang OCD Region VI.
Buot silingon sini amo ang whole level ukon 24/7 nga coordination agud masigurado nga ma-monitor sang maayo ang bagyo kag ang pagpanghanda sang tagsa ka lugar batok sa halit sini.
Subong nga adlaw, Pebrero 19, ginmanduan man ang mga local Disaster Risk Reduction and Management Offices nga magpatigayon man sang pre-assessment kag emergency meetings.
Sa pagsinapol sang OCD Region VI, nadiskusyunan naman ang food packs kag non-food pack items para sa mga posible nga evacuees, pagkanselar sang sea travels depende sa pagkinahanglan, kag iban pa nga preparedness measures.
Gina-abisuhan ang tanan pati na ang mga residente sa nabaw-ing nga mga barangay nga mangin alerto gid adlaw man ukon gab-i, kag hibaluon kun sa diin sarang maka-evacuate antes pa man maglain ang sitwasyon.
Sa probinsya sang Iloilo, napatawag naman ni Iloilo Governor Arthur Defensor Jr. ang Disaster Cluster sang Iloilo Provincial Government para sa preparasyon.
Sa interview sang Bombo Radyo kay Defensor, iya ginpahayag nga ginaumpisahan na ang paghanda sa emergency vehicles, relief operations, kag pati na ang disinfectants kag PPEs.
Agud mahibaluan ang ginapanan-aw nga risgo kag dugang pa nga preparasyon, may meeting man ang Provincial Disaster Risk Reduction and Management Council 3:00 karon sa hapon.
Santo sa pinakaulihi nga forecast sang Philippine Atmospheric, Geophysical, and Astronomical Services Administration (Pagasa), posible nga magbaskog pa ang pwersa kag mahimo nga severe tropical storm ang Auring sa tunga-tunga sang Biyernes kag Sabado antes ang landfall nga posible matabo sa Caraga Region sa Sabado sang gab-i ukon Domingo sang aga.
Suno kay John Michael Dionon sang PAGASA Iloilo, base sa forecast track, mataas ang tsansa nga maglandfall man sa sentro sang Panay Island (sa sentro sang central Iloilo padulong sa Northern part) ang bagyo kun indi magbaylo ang direksyon sini.
Ulihi nga nasiplatan ang tropical storm Auring nga may kalayuon nga 605 kilometers east sang Hinatuan, Surigao del Sur nga may maximum sustained winds nga 75 kilometers per hour malapit sa sentro kag pagmadlos nga tubtob 90 kph.
Nagahulag ini sang mahinay pa-nakatundan.
