Napadyaan gid ang kabuot kag kapisan sang isa ka maukod nga promo participant sang Bombo Radyo kag STAR FM.
Regional prize winner si Kathline Labrador, 54, residente sang Jereos Extension Road, La Paz, Iloilo City sa grand draw sang One Two Panalo Part 19 Promo sang Bombo Radyo kag Star FM nga ginpatigayon subong nga adlaw, Pebrero 20.
Sa interview sang Bombo Radyo kay Betty Daymon Rile, isa ka abyan kag isa man sa mga nagatatap kay Kathline, iya ginpahayag nga mismo si Kathline ang nagatipon sang sobre, nagapamala sang proof of purchase, kag nagapangalan sang iya entries.
Naaksidente si Kathline sang tatlo pa lang siya ka tuig gani nga naapektuhan sini ang iya nga speech kag ‘daw nagbalik sa pagkabata’ suno kay Rile, apang pahayag niya, indi ini upang agud nga makabulig si Kathline sa balay kag iban pa nga ulubrahon. Nalipay man si Rile nga sa tanan nga nagapasakop sa promo, napilian gid si Kathline.
Ini bangud suno kay Rile, indi man basta-basta ang ginatos nga entries ni Kathline.
“Nagabayad kami sa iya nga PhilHealth kag SSS. Papahuwayon ya kuno ako sang isa ka bulan kay siya lang ang mabayad. Ang iban ideposito niya kuno sa bangko. Kay I keep telling her nga she is getting older so kinahanglan niya nga mag-save,” pahayag ni Rile.
Plano man ni Kathline nga ibakal ang iya kwarta sang iban niya nga kinahanglanon. Ang One, Two, Panalo Part 19 promo sang Bombo Radyo kag Star FM ang naga-isahanon nga promo sa radyo sa tunga sang krisis sa ekonomiya bangud sa COVID-19 pandemic.
