ILOILO – Wala sang mayor nga halit nga ginbilin ang Bagyo Auring sa Western Visayas halin sang nagsulod ini sa Philippine Area of Responsibility (PAR) tubtob nga naghina kag nahimo na lang nga low pressure area.
Ini ang ginkumpirma sang Regional Disaster Risk Reduction and Management Council (RDRRMC) VI.
Suno kay Office of the Civil Defense (OCD) Disaster Risk Reduction and Management Division Chief Ma. Aletha Nogra, wala man sang reported casualty sa rehiyon nga may kaangtanan sa amo nga weather disturbance.
Sa Western Visayas, 933 ka pamilya nga katumbas 2,989 ka indibidwal ang nag-evacuate gikan sa 24 ka barangay agud nga makalikaw sa posible nga halit.
Gilayon naman nga ginpapauli sa ila mga balay ang mga residente sang maayo na ang panahon.
Wala man sang damaged nga dalan, balay, taytay kag wala man sang major flooding nga natabo.
Sa Batad, amat-amat naman nga napabalik sa ila mga balay ang 170 ka mga pamilya nga nagsugod evacuate sang wala pa na-lift ang Storm Signal Number 1.
Suno kay Batad Mayor Elvira Alarcon, ang mga evacuees ang nagikan sa 7 ka mga barangay sa amo nga banwa:
-Alinsolong- 46 pamilya
-Embarcadero- 1 pamilya
-Malico- 14 pamilya
-Pasayan- 7 pamilya
-Salong- 18 pamilya
-Tanao- 60 pamilya
-Binon-an- 24 pamilya
Ginpasigurado man suno kay Alarcon nga nahatagan sang relief packs ang mga indibidwal sang sila ang nagmato-mato kadto sa evacuation centers.
Wala man sang mayor nga pagbaha nga natabo sa banwa sang Batad kag nangin maguom-guom lang ang panahon.
