ILOILO CITY – Magapangatubang sang kaso nga four counts sang violation sa Anti-Red Tape Act kag falsification of public document ang babaye nga nadakpan sa isa ka mall sa Barangay San Vicente, Jaro, Iloilo City nga nagapangpeke sang driver’s license.
Ang arestado amo si Lalaine Banse, 56, residente sang Barangay Balabago, Jaro.
Sa interview sang Bombo Radyo kay Atty. Gaudioso Geduspan, assistant regional director sang Land Transportation Office Region VI, iya ginpahayag nga magluwas sa nag-surface nga complainant, nakuha man sa possession ni Banse ang tatlo ka iban pa nga peke nga lisensya.
Sa inisyal nga impormasyon sang LTO, 2019 pa nagaumpisa sang pagpangpeke si Banse.
Nagapangita siya sang kliyente sa Iloilo, ginapadala ang dokumento sa Metro Manila, kag ginapadala-balik sa Iloilo paagi sa courier.
Sa transaksyon ni Banse, P4,500 ang bayad sa non-professional driver’s license — tuman ka mahal ipaanggid sa ginapahayag ni Geduspan nga kapin P1,500 nga bayad sa LTO.
Ginapahayag nga may P1,000 man nga porsyento si Banse sa kada transaksyon.
Nagpasalig si Geduspan nga indi makalusot ini nga mga transaksyon sa Anti-Fixer team sang LTO.
Sa pagkamatuod suno sa LTO official, may empleyado man mismo sa sulod sang talatapan sang LTO nga nadakpan nga nagapangpeke sang driver’s license kag natalana naman nga pasakaan sang kaso.
