ILOILO CITY – Hugot nga ginapamatukan sang grupo nga Bayan-Panay ang ‘No Vaccine, No Work’ policy.
Sa interview sang Bombo Radyo kay Bryan Bosque, deputy spokesperson sang Bayan-Panay, iya ginpahayag nga ini nga polisa ang nagapanubo pa gid sa numero sang mga tawo nga maka-access sa trabaho.
Suno kay Bosque, kun ipatuman ini sang gobyerno, mas pabudlayan pa gid sini ang mga tawo sa tion sang pandemya kun san-o nadulaan man sang pangitan-an ang kadam-an.
“Isa gid daku nga NO sa ‘No Vaccine, No Work’ policy. Sa tanan tani nga desisyon sang gobyerno, ikonsiderar man ang tawhanon nga kinamatarong. Instead nga mag-impose sang policies nga nagadingot sang trabaho sa mga pumuluyo, dapat gani dugangan pa gid naton,” pahayag ni Bosque.
Dapat man suno sa iya nga magtutok ang gobyerno sa pag-edukar sa mga tawo kag pagsabat sa mga pamangkot ilabi na bangud tuman pa ka preska sa huna-huna sang mga Pinoy ang Dengvaxia controversy sa pungsod.
“Instead nga magpahapos, we should take time educating our people kun ano ang pros and cons sa vaccination para nakahibalo sila kun mapabakuna sila ukon indi.”
Nagpanugyan man si Bosque sa gobyerno nga agud mapanas ang kulba sang mga tawo, kuntani, magbutang man sang nagakaigu nga tawo nga makapungko sa posisyon.
“Ang Secretary sang Department of Health…it seemed for us nga very ineffective gid sa pag-address sa pandemya. Ang aton nga vaccine czar, retired military. Mismo ang gobyerno ang nagahatag rason kun ngaa nagakahangawa ang tawo kag indi magpati sa ila nga mga programa sa pagsolbar sa sining health crisis naton,” dugang pa sang natungdan.
