ILOILO CITY – Nagapanawagan ang Simbahang Katolika sa gobyerno nga mangin patas sa vaccine literacy programs ilabi na subong nga madamo gihapon nga tawo ang nagapangduha-duha sa pagpabakuna.
Sa interview sang Bombo Radyo kay Monsignor Meliton Oso, director sang Jaro Archdiocesan Social Action Center, iya ginpahayag nga kinahanglan nga iplastar sang maayo sa tawo ang bentaha kag disbentaha sang COVID-19 vaccine.
Ini lang suno sa iya ang paagi agud nga ma-edukar sang husto ang tawo kag makahibalo siya magbalanse sang maayo kag indi kag kun ano ang nagakabagay para sa iya lawas.
“Dapat nga ipahayag naton sa tawo ang pains… ipahayag naton ang gains. Then he decides. Ipahayag naton ang bentaha kag disbentaha…Kinahanglan ang patas nga edukasyon so that mainform sang nagakaigu ang konsensya sang tawo. Kun piliton kita [nga magpabakuna], I will call that a de facto medical martial law,” pahayag ni Oso.
Ginatumod sang natungdan ang pahayag nga emergency use authorization pa lang ang ginhatag sa mga COVID-19 vaccine kag ang mga pahayag sang iban nga indi man makahatag sang immunity sa lawas sang tawo ang COVID-19 vaccine.
Ginpahayag man sang natungdan nga dapat naga-ugat sa informed consent ang desisyon sa vaccination kag wala dapat sang pilitay nga ipatuman.
“Bisan nagpabakuna ang Santo Papa kag ang Pope Emeritus.. that is a good example… but at the same time, nagapangagda lang ang Simbahan, wala nagapamilit. [Ang pagpabakuna], base ina sa imo nga informed consent. Hilway nga desisyon.”
Ang Simbahan ang may yara man sang ginahanda nga vaccine literacy program ukon ‘balanced information and education campaign’ nga igalunsar.
