ILOILO CITY – Tuman ka budlay ang pagpatigayon sang sports programs umpisa sang gindumilian ang face-to-face classes sa Pilipinas bangud sang COVID-19 pandemic.
Sa interview sang Bombo Radyo kay Dr. Nicasio Valenzuela, division sports coordinator sang Department of Education Schools Division of Iloilo (DepEd Iloilo), iya ginpahayag nga indi epektibo ang tanan nga programa sa sports kun limitado lang online.
Paathag ni Valenzuela, bisan sa training, kinahanglan man ang practical application ukon practicum ukon actual performance kun sa diin mahimo ma-correct gilayon kun may sala sa hulag sang trainee.
Magluwas diri, plano man kuntani sang DepEd Iloilo nga ipatigayon ang 2020-2021 Western Visayas Regional Athletic Association (WVRAA) Meet sa Abril kag sa pagkamatuod, naumpisahan na ang plano kag training sang nagligad nga Enero.
Apang ini ang ginkanselar naman bangud sang bag-o nga variant sang coronavirus nga nakasulod na sa Pilipinas.
Sa subong suno kay Valenzuela, nagahulat lang ang DepEd Iloilo sa guidelines nga idagdag sang central office ukon sang national government may kaangtanan sa implementasyon sang sports programs.
Subong nga adlaw, Marso 1, balantayan man suno sa natungdan ang online discussion nga pangunahan sang central office sang DepEd may kaangtanan sa posible patigayunon nga Palarong Pambansa 2021.
Matandaan nga suspendido sang nagligad nga Mayo 2020 ang Palarong Pambansa bangud man sang pandemya.
Suno naman kay Professor Noel Mondejar, department chair sang Physical Education sa College of PESCAR sa West Visayas State University-Main Campus, mabudlay ang tanan nga PE classes bangud isa-isahon gid ang movement.
Ang nagakatabo suno kay Mondejar, gina-record sang manunudlo ang iya hulag kag isend sa iya mga estudyante paagi sa Google meet ukon sa Facebook.
Ini nga proseso ang himuon man sang estudyante kun magpa-check sang ila performance sa ila manunudlo.
Bangud sini suno sa natungda, ginaistoryahan man nga kuntani, ibalik ang face-to-face classes nga may limitado nga attendees ukon estudyante agud nga matutukan man ang mga klase.
