DINGLE, ILOILO – Ginhanduraw sang pamilya kag mga abyan ni Bombo International Correspondent Merly Bunda ang iya kabuot, kaalwan, kag kapisan kadungan sang pag-abot sang iya bangkay sa Brgy. Namatay, Dingle, Iloilo.
Si Bombo International Correspondent Merly Bunda nga ginatawag man nga Manang Merly ang napatay sa edad nga 54 sa isa ka ospital sa Hong Kong bangud sang stage 4 uterine cancer.
Sa interview sang Bombo Radyo kay Ronaldo Bunda, magulang ni Manang Merly, iya ginpahayag nga sang nagligad nga tuig katapusan nga nakapauli si Manang Merly kag nakahibalo na siya sang kondisyon sang iya lawas.
Nagpamilit si Manang Merly nga magbalik sa iya trabaho sa Hong Kong apisar gin-ayo na kuntani sang iya pamilya nga diri na lang siya sa Iloilo.
Madamo sang nabulig si Manang Merly sa iya pamilya kag sa pagkamatuod suno kay Tatay Ronaldo, nakapatindog pa siya sang balay.
Malapit man si Manang Merly sa mga kabataan kag wala gid napalya sa pagbulig sa iya mga himata paagi sa pagpadala sang kwarta.
Palangga man sang Ilonggo Community sa Hong Kong si Manang Merly.
Sa interview sang Bombo Radyo kay Merlyn Sobrevega, tumandok sang Mina, Iloilo nga nagatrabaho sa Hong Kong, iya ginpahayag nga kilala nga mabinuligon kag mapinalanggaon si Manang Merly.
Suno kay Sobrevega, masami niya makit-an kag mabatian si Manang Merly nga naga-report sa Bombo Radyo kag saksi gid siya kun paano nagapangabudlay si Manang Merly agud makatipon sang mga impormasyon sa Hong Kong.
Ginpahayag pa ni Sobrevega nga nagakadto pa sa ospital kag presuhan si Manang Merly agud magbisita sa iban nga overseas Filipino workers.
Suno naman kay Bombo Alumni Association (BALA) Member Nenen Barnuevo, masobra pulo ka tuig man nga nangin international correspondent si Manang Merly.
Antes pa man nagpadulong sa Hong Kong, mainabyanon na si Manang Merly sa mga personnel sang Bombo Radyo kag nakitaan gid sang kabubut-on sa pagbulig sa iban.
Suno kay Barnuevo, mismo si Manang Merly ang nagapresentar sang iya nga reports kun may dalagku nga hitabo sa amo nga rehiyon kag kun may mga problema ang mga OFWs nga kinahanglan mahibaluan sang ila mga pamilya indi lamang sa Iloilo kundi diin man nga bahin sang Pilipinas.
