Masobra 17,000 ka doses sang China-made coronavirus vaccines ang magaabot sa Western Visayas subong nga adlaw, Marso 5.
Sa interview sang Bombo Radyo kay Dr. Mary Jane Juanico, pinuno sang Infectious Disease Cluster Unit sang Department of Health Region VI, iya ginpahayag nga ihatag ang Sinovac COVID-19 vaccines sa anum ka mga priority hospitals sa Western Visayas.
Duha diri ang sa Bacolod City nga amo ang Corazon Locsin Montelibano Memorial Regional Hospital kag Dr. Pablo O. Torre Memorial Hospital (ukon Riverside Medical Center).
Ang apat naman nga yara sa syudad sang Iloilo amo ang Western Visayas Medical Center, West Visayas State University Medical Center, Iloilo Doctor’s Hospital, kag Iloilo St. Paul’s Hospital.
Suno kay Juanico, kun pila ka personnel ang yara sa priority hospital amo man ang katumbas nga bakuna nga mabaton.
Sa subong, yara sa 40 tubtob 50 percent ang vaccine hesitancy sa mga health workers sa Western Visayas.
Indi man mandatory ang vaccination suno kay Juanico gani nagahanda sang quick substitution list ang DOH Region VI.
Ini agud indi mauyang ang doses sang bakuna kag mapasa sa masunod nga priority hospital kun indi ma-consume sang una nga ginprayoridad nga ospital.
Istoryahan pa suno kay Juanico kun san-o gid patigayunon ang vaccine rollout.
Samtang wala pa sang pinal nga schedule, idiretso anay sa cold storage facility sa talatapan sang DOH Region VI ang mga bakuna.
Samtang, may kaangtanan naman sa 487,200 doses sang AstraZeneca vaccines nga nag-abot sa Pilipinas kagab-i, wala pa sang ideya si Juanico kun may parte diri ang Western Visayas.
