Maragtason ini nga adlaw, Marso 14, para sa mga Pilipino sa Pilipinas kag sa luwas sang pungsod — adlaw nga pangunahan ni Pope Francis ang misa sang selebrasyon sang ika-500 nga anibersaryo sang Kristiyanismo sa Pilipinas.
Ang misa ang patigayunon sa Altar of the Chair sa Saint Peter’s Basilica 10:00 sa aga sa Rome, Italy (kag 5:00 sa hapon ang oras diri sa Pilipinas).
Sa interview sang Bombo Radyo kay Reverend Father John Tadifa direkta sa Rome, Italy, iya ginpahayag nga limitado lang ang makatambong sa St. Peter’s Square, isa ka daku nga plaza sa atubang sang St. Peter’s Basilica, bangud istrikto nga pagasundon ang physical distancing kag iban pa nga minimum health protocols.
Sarang malantaw sang mga tumuluo ang misa paagi sa widescreens nga ibutang sa piazza sa gwa sang basilica.
Santo sa briefer nga ginprovide sang Catholic website nga Dominus Est, 100 ka mga tawo ang pahanugutan sa sulod sang Altar of the Chair of Saint Peter.
10 lang ka celebrants ang mahimo makaupod sa Santo Papa.
Lakip diri si Cardinal Luis Antonio Tagle, prefect of the Congregation for the Evangelization of Peoples kag anay archbishop of Manila, kag amo man si Cardinal Angelo De Donatis, ang vicar sang Santo Papa para sa Roma.
Sa patigayunon nga misa, tatlo ka lenggwahe ang gamiton nga amo ang Italian, English, kag Filipino.
May pila ka mga ambahanon nga mahimo maamba sa Cebuano.
Ang opening hymn amo ang ‘Gozos’ ukon mas kilala nga Bato Balani sa Gugma, isa ka bantog nga devotional song para sa Santo Niño de Cebu; samtang, closing hymn naman ang ‘Maria, Rayna sa Pilipinas’ nga isa man ka Cebuano hymn.
Magatokar man bilang recessional hymn ang ‘We Give Our Yes’, ang official theme song sang ika-500 nga anibersaryo sang Kristyanismo sa Pilipinas.
Apisar indi pa subong maathag kun pila gid ka mga Pilipino ang magatipon sa St. Peter’s Square, nagakalangkag na si Father Tadifa kag ang Pontificio Collegio Filippino sa Via Aurelia, Rome, Italy bangud mismo ang Santo Papa ang magapanguna sa aktibidad.
Indi ini ang una nga bes nga magapanguna si Pope Francis sang misa para sa mga Pilipino.
Sang 2019, si Pope Francis ang naghimo man sang maragtas bilang labing una nga Santo Papa nga nagpanguna sang Simbang Gabi Mass para sa Filipino community sa Rome.
Magluwas diri, makabig man nga swerte ang Filipino Community bangud napahanugutan pa ang selebrasyon antes ang lockdown nga ipatuman sa Lunes, Marso 15, bangud sang third wave sang coronavirus infections.
Ginalauman man nga ang misa sang Santo Papa ang panguna lamang sang quincentennial celebrations sa Rome.
Sa Abril 4, ginalauman nga pangunahan ni Cardinal Tagle ang Easter Sunday Mass para sa Filipino community sa Santa Maria Maggiore Basilica sa Rome.
Para naman kay Reverend Father Tadifa, ang selebrasyon ang pahanumdom man sa mga tumuluo sang daku nga responsinbilidad kag mga hangkat sa pagpanglakaton bilang mga Kristiyano.
May kaangtanan sini, ang Bombo Radyo Philippines magadul-ong sining makasaysayan nga selebrasyon sang misa nga pagahiwaton sa St. Peter’s Basilica sa Vatican City, Italy.
Sarang ini nga malantaw sa Facebook Live sang Bombo Radyo Iloilo.
Magadul-ong man sang live reports angut sa kahiwatan ang mga Bombo International Correspondents direkta sa Rome, Italy kag sa Vatican City.
Eksklusibo man nga mabatian ang ambahanon nga “Called to Share”, ang gindihon nga Exclusive Original Song sang Bombo Radyo Philippines sa okasyon sang 500 Years of Christianity sa Pilipinas.
