100% na nga nagbukas ang mga negosyo sa Texas, USA, ginbasura na ang mandato sa pagsuksok sang face mask, ginpahalugan ang mga restrictions… apang indi tanan ang naghugyaw sa sini nga mga pagsulundan.
Marso 10 sang gintapos ni Governor Greg Abbott ang statewide mask mandate sa Texas, ang estado sa Estados Unidos kun sa diin napatay ang 43,000 ka mga tawo bangud sang coronavirus infections.
Apisar madamo ang literal nga nakaginhawa sang maayo bangud sang ginbag-o nga pagsulundan, ang bag-o nga executive order sang gobernador ang gilayon nga nakaangkon sang pagpakamalaot kag kahangawa gikan sa iban nga mga government officials.
Mangin si President Joe Biden ang nagpahayag nga ‘big mistake’ ukon daku nga sala ang pagkakas sang mask mandate.
Apat sa mga coronavirus medical advisers ni Abott ang nagpahayag nga wala sila ginkonsulta antes ang pagpatuman sang bag-o nga mandate.
Nagwangal ang mga health officials ilabi na bangud 7.1% pa lang sang kapin 30 million ka residente sa Texas ang nakakumpleto sang ila vaccination suno sa data sang Centers for Disease Control and Prevention.
Nagaagunto man ang magagmay nga mga negosyo bangud wala nakahibalo ang mga tag-iya kun sa diin sila malugar. May mga business owners nga nag-require sa gihapon sang face mask; kag kun may magreklamo, wala sila ginaserbehan sang pagkaon. Bilang balos, ginapahog sang mga kustomer ang mga tag-iya nga ireport sa Immigration and Customs Enforcement agency.
Apisar sini tanan, suno kay Bombo International Correpondent Rufino ‘Pinoy’ Gonzales direkta sa Texas, USA, kumpiyansa si Abbott kag ang iya mga kaalyado nga indi na magtimbuok ang COVID-19 cases.
Sa statement nga ginpagwa sang nagligad nga semana, nagpahayag si Abbott nga matuod nga may yara pa sang coronavirus apang indi na kinahanglan ang ini nga mga mandato bangud sang numero sang recoveries, vaccinations, reduced hospitalizations, kag safe practices sang Texans.
Bangud sini suno kay Gonzales, nagagutok subong ang mga hotels kag resorts bangud sa tuman ka damo nga reservations — butang nga ginakabig sang kalabanan nga ‘new normal’ matapos ang halos isa ka tuig nga pagpangapa-kapa bangud sang pandemya.
