Indi pabor si Antique Governor Rhodora Cadiao nga i-require ang negative swab test result sa magapauli nga mga residente sa Antique kag amo man sa domestic travelers sa probinsya.
Kahapon, Marso 15, sang nagsapol ang mga local chief executives sa Western Visayas kag nahisugtan nga hingyuon sa National Inter-Agency Task Force nga himuon nga requirement para sa mga byahero nga magapadulong sa Rehiyon VI nga mag-secure sang negative RT-PCR test result tatlo ka adlaw antes ang petsa sang pagbyahe.
Sa amo nga virtual nga pagsinapol, wala nakatambong si Cadiao kag wala man sang tiglawas halin sa Antique Provincial Government bangud sang technical problems.
Sa interview sang Bombo Radyo kay Cadiao, iya ginpahayag nga magasunod ang probinsya sang Antique sa iban nga Uniform Travel Protocols sa Western Visayas magluwas lang sa swab test.
Ini bangud lima ka bulan na nga wala nagarequire sang negative RT-PCR test result ang probinsya sang Antique para sa ila returning residents.
Gin-rason man ni Cadiao nga santo sa Resolution 101 nga gin-isyu sang National IATF sang Pebrero 26, indi mandatory ang quarantine kag RT-PCR test result para sa byahero kundi nakadepende lang sa LGU-point of destination.
I-refer pa ni Cadiao ini nga concern sa IATF sa Antique kag maapelar man siya sa iban nga local chief excutives sa Western Visayas nga ma-status quo lang ang Antique sa travel requirements.
Sa subong, wala sang quarantine kag swab test nga required para sa magapauli nga locally stranded individuals (LSIs) kag returning overseas Filipinos (ROFs) sa probinsya sang Antique. Indi man kinahanglan ang medical certificate kag travel authority kun magpauli ang LSIs kag ROFs amo nga probinsya.
Ang kinahanglan lang isecure amo ang letter of acceptance kag letter of coordination sa LGU nga paulian sang LSIs kag ROFs.
Irequire lang ang quarantine kag swab test kun makitaan sang sintomas sang coronavirus ang LSI kag ROF.
Suno kay Cadiao, ang labi gid nga tinutuyo sang halog nga restrictions sa Antique amo nga mapabangon ang ekonomiya.
Santo sa record sang DOH Western Visayas, ang Antique ang may yara sang 114 total cases sang COVID-19, 3 ang active cases, kag isa ang napatay.
