Siguraduhon sang Public Safety and Transportation Management Office (PSTMO) nga indi na makaliwat sa iya modus ang fixer nga traffic enforcer nga nadakpan sa entrapment operation sang Land Transportation Office (LTO) Region VI.
Ang arestado amo si Jeffrey Trabajada, 33, panghapon nga traffic enforcer nga assigned sa Taft North, Mandurriao, Iloilo City.
Marso 11 sang nakit-an sang Anti-Fixer team sang LTO Region VI ang makaduluda nga Facebook post ni Trabajada kaangot sa LTO services kag ini ang may caption nga ‘PM IS THE KEY’.
Nag-private message ang katapo sang Anti-Fixer Team kag natukiban nga ang modus ni Trabajada amo ang pagproseso para sa theoretical driving course completion sa isa ka driving school sa syudad.
P4,000 ang ginabaton ni Trabajada sa kada transaksyon sa theoretical driving course completion nga amo ang requirement agud makakuha sang student’s permit sa talatapan sang LTO.
Ang violation nga nakomiter ni Trabajada amo ang paglapas sa Anti-Red Tape Act of 2007.
Sa interview sang Bombo Radyo kay Atty. Gaudioso Geduspan, assistant regional director sang LTO Region VI, iya ginpahayag nga may isa pa ka kaupod si Trabajada nga imbestigaran pa sang talatapan.
Padal-an man sang show cause order ang driving school sa syudad nga amo ang ginapahayag ginakuhaan ni Trabajada sang padali nga certification para sa iya nga nga kliyente.
Ginkumpirma naman ni Mr. Jeck Conlu, pinuno sang PSTMO, nga mapadala siya sang rekomendasyon kay Iloilo City Mayor Jerry Treñas agud masipa halin sa serbisyo ang nasambit nga traffic enforcer.
Sundon suno kay Conlu ang One Strike Policy agud nga mapapas ang kurapsyon.
Ginpahayag ni Conlu nga indi man makalusot ang isa ka pa ka ginapahayag nga kaupod ni Trabajado kun mapamatud-an ini nga guilty sa amo man nga panumbungon.
