ILOILO CITY – Nagsugtanay ang lokal nga panguluhan sang syudad kag probinsya sang Iloilo nga maghingyo sa national government nga temporaryo anay nga dumilian ang mga byahe sang eroplano kag barko nga halin sa Rehiyon 7 ukon Central Visayas, National Capital Region, kag Calabarzon.
Ang request ang pending pa para sa approval sang National Inter-Agency Task Force.
Sa interview sang Bombo Radyo kay Iloilo City Mayor Jerry Treñas, iya ginpahayag nga tubtob lang sa Abril 10 ang ma-cover sang ila requested nga moratorium.
Exempted naman diri ang byahe sang cargo.
Ang moratorium nga ginhingyo ni Mayor Treñas kag ni Iloilo Governor Arthur Defensor Jr. ang kasunod sang 7,999 new coronavirus cases
nga narekord sa Pilipinas kahapon nga adlaw, Marso 20 — pinakamataas nga single day infections halin sang nag-umpisa ang pandemya sa pungsod.
Ini ang magluwas pa sa kumpirmasyon sang Department of Health nga may nagdugang man nga 114 ka new cases sang tatlo ka nanuhay-tuhay nga COVID-19 variants kun sa diin kalabanan ang naghalin sa Metro Manila.
Una diri, gin-aprubahan man sang IATF nga kinahanglan mag-secure sang negative RT-PCR test result ang tanan nga byahero (lakip na ang APOR) nga magasulod sa Western Visayas at least 72 hours antes ang petsa sang pagbyahe.
