ILOILO – Mabuot nga tawo, wala sang gamo, kag mabinuligon ang 51 anyos nga si Jail Senior Inspector Andrew Larupay, jail warden sa La Carlota City Jail sa Negros Occidental, nga ginluthang-patay sa Bangga Dama, Brgy. Bolong Oeste, Sta. Barbara, Iloilo kasunod sang road rage.
Ini ang paglaragway ni Bureau of Jail Management and Penology Region VI Assistant Director Jail Senior Superintendent Gilbert Peremne sa biktima.
Sa interview sang Bombo Radyo kay Peremne, iya ginpahayag nga halin sang kolehiyo, kilalahay na sila si Larupay kag kilala niya ini bilang isa ka indibidwal nga indi madali maakig kag nagaakomodar gid kun may mangayo sang bulig sa iya.
26 ka tuig na si Peremne kag si Larupay sa serbisyo kag sa amo ka lawig nga tion, matinlo ang rekord ni Larupay suno kay Peremne.
May kaangtanan sa mga pahayag nga si Larupay ang una nga nagpalapit sa tatlo ka katapo sang militar kag nagpangtaya sang armas, ginpahayag ni Peremne nga itugyan nila ini sa mangin resulta sang imbestigasyon sang Sta. Barbara Municipal Police Station.
Ginkumpirma man ni Peremne nga ginaproseso na sang ila nga mga personnel ang tanan nga claims kag financial assistance nga ihatag sang BJMP sa pamilya sang nagtaliwan nga jail warden.
