May potensyal ang tanan nga tawo — pigado man ukon manggaranon — apang kinahanglan lang ang oportunidad kag suporta agud nga magamit ini nga natago nga potensyal.
Ini ang ginpakigbahin ni Dr. Astrid Tuminez, tumandok sang Pali, Tigbauan, Iloilo kag labing-una nga female president sang Utah Valley University, ang pinakadaku nga pampubliko nga unibersidad sa Utah sa Estados Unidos.
Sa exclusive interview sang Bombo Radyo kay Tuminez may kaangtanan sa pag-obserbar sang Women’s Month, iya ginpahayag nga duha pa lang siya ka tuig sang nagdesisyon ang iya nga iloy nga dal-on siya kag ang iya anum ka mga utod sa syudad sang Iloilo.
Suno kay Tuminez, luyag gid sang iya nga iloy nga makaeskwela sila sang maayo — butang nga natuman man paagi sa bulig sang mga madre halin sa Colegio del Sagrado Corazon de Jesus.
Apisar nagpuyo sa squatters area sa Iloilo City Proper, naka-eskwela si Tuminez nga wala sang bayad kag pagkagradwar halin sa amo nga Catholic School, nag-eskwela siya sa Philippine Christian University Union High School of Manila kag nakaeskwela pa gid sa University of the Philippines Diliman.
Ang iya kaukod sa pagtuon ang nagdala sa iya sa Estados Unidos kun sa diin nag-tapos siya bilang summa cum laude sa bachelor’s degree nga international relations and Russian literature halin Brigham Young University sa Provo, Utah sang 1986.
Nakuha niya ang iya master’s degree sa Soviet Studies sa Harvard University sang 1988 kag ang iya Ph.D. sa political science halin sa Massachusetts Institute of Technology sang 1996.
Suno kay Tuminez, sa sining malawig nga tinuig sa eskwelahan, wala gid siya nagkataka sa pagbasa sang mga libro sa library; sa pagkamatuod, didto siya nagapalipas sang oras kun wala siya sang inugbakal sang pagkaon sa recess period.
Ang iya nga kahilig sa pagbasa ang rason kun ngaa nagsangkad ang iya nga mga ihibalo.
Sa bulig sang kaalam nga iya nakuha sa lain-lain nga unibersidad, nakatrabaho siya sa lain lain nga mga pungsod lakip na sa United States, Russia, Hong Kong, Singapore, kag Pilipinas.
Sang 2018, siya ang ginwelcome bilang ika-pito nga presidente kag first female president sang Utah Valley University. Sa iya una nga adlaw sa amo nga unibersidad, nagdayaw ang madamo nga tawo bangud sa iya pagwelcome sa mga estudyante gamit ang anum ka lenggwahe — Spanish, English, Hiligaynon, Tagalog, Russian kag French.
Subong nga siya ang lider sa daku nga unibersidad, advocacy niya para sa mga babaye ang edukasyon kag leadership — nga suno sa iya, masarangan sang mga babaye nga makapamuno nga wala sang intimidation nga mabatyagan.
“Kun kabalo ka sang ginahimo mo, respetuhon ka sang tawo… Bisan ano ang trabaho mo, wala sang question kun maalam ka kag nakahibalo ka sang ginapanghimo mo… That is why wala ako nakaagi nga na-feel ko nga intimidated ako,” pahayag ni Dr. Tuminez. #
