Hingyuon sang Malacañang ang Department of the Interior and Local Government (DILG) nga imbestigaran si Tacloban City Mayor Alfred Romualdez matapos ang pagpabakuna sini batok sa COVID-19 apisar indi man siya medical frontliner.
Suno kay Presidential Spokesperson Harry Roque, amo man sa gihapon ang prayoridad sang gobyerno sa vaccination list.
Indi mahimo unahon sa pagbakuna ang mga indi frontliners suno kay Roque bangud maapektuhan ang suplay sang bakuna kun indi pagsundon ang order of priority.
Nahibaluan nga mismo si Romualdez ang nagpost sang iya laragway kag video nga nagapabakuna bisan indi siya health worker kag wala pa siya sang ginasuksok nga face mask.
Sa iya naman statement nga ginsapubliko, ginpahayag ni Romualdez nga nagpabakuna lang siya agud nga mapataas ang vaccine confidence sang iban nga mga pumuluyo.
Nagpanindugan man ang alkalde nga positibo man gani ang reaksyon sang publiko sa iya ginhimo nga public vaccination gamit ang CoronaVac, ang COVID-19 vaccine nga iya sang Sinovac Biotech sang China.
Nagpahayag man si Romualdez nga handa siya mag-atubang sang sanctions kun may nalapas siya nga protocol.
Magluwas kay Romualdez, nakabaton man sang pagpakamalaot halin sa publiko ang alkalde sang Minglanilla sa Metro Cebu nga si Elanito Peña nga nag-una man sa pagpatublok sang bakuna bisan indi man siya health worker.
